Çe Ruslan Poladovi vəkili təhdid kardedən

Jurnalist Polad Aslanovi vəkil Elçin Sadığovi ıştə “Fasebook” səhifədə nıvıştəşe ki, ey Poladi mudafiəku dast kəşe məcbur karde pidəşone. Çe Aslanovi istintaği bardə odəmon sıftə bey çəşnavi doəşone ki, ım koyku dast bıkəşo. Isət əvon tars omedən, təhdid kardedən ki, Aslanovi mudafiəku imtina nıko, bey zəfə bərosnen.

De istintağə orqani jıqo ğeyri-ğanuniə hərəkəti əlağədar Elçin Sadığov bə ğəror omə ki, bə prezident Əliyevi muraçiət bıkardo. Əlavən bıvotım ki, “Xəbərman” və “Press-az” sayton redaktor Polad Aslanov çe Devlətə Əmniyyətə Xidməti tərəfo iyunə manqi 13-ədə dəstqir kardəşone. Bə çey əleyh de Cinayətə Məcəllə 274-minə, bə devləti xəyanət maddə cinayətə ko bino bıə.

Nardarani faciə məhbus Cahad Babakişizadə ki, bə 14 sor 6 manqinə zindonə cəzo məhkum kardəşone, ısət Ğobustoni zindonxonədə cəzo kəşedə. Çey nezə odəmon bo Azadi Radio qəp jəşone ki, Cahadi səhhət xeyli qıvonine, Nardarani əməliyyati vaxti çey ciqər zədəjə bıə. Imi ısət udul kardəşe, ey bə mualicə ehtiyac hestışe, əmo zindonxonə rəhbəriyyət ey bə Penitensiar Xidməti Mərizxonə ovoştınidəni. Penitensiar Xidməti Tibbi Sər İdarə rəisi muavin İftixar Ğurbanovi bə  Radio muxbiri parsi cəvobədə votəşe ki, Babakişizadə səhhət sabite, bə çey jimoni hiç qıley xəto ni.

Gəncə hadisə məhbuson səhhətədən problemon bə meydon beşedə. Məhkəmədə çe Şahin Verdiyevi və Asif Cavadovi səhhət anədə kritik bıə ki, hakim bə məhkəmə təcili tibbiə koməkə xidməti vanq karde məcburiyyətədə mandə. Məhkəmə peşonə iclasədə muttəhimon çe doktoron dəvon rəftoriku bə hakimi şikat kardəşone. Şahin Verdiyevi votəşe ki, həkimon dəmə bənə deşmeni rəftor kardedəbin, jıqo təhğiramizə sıxanon votedəbin ki, əsəbiku çəmə səhhət həniən qıvonin bedəbe. Həkim kam mane ki, mıni bıku.

Hakimi ğəror doəşe ki, çe doktori jıqo hərəkəti barədə akt tərtib kardə bıbo.