Bokuədə polisi dini kitobon musadirə kardəşe
Bə Dini Təşkilaton dair Devlətə Komitə sədr Mubariz Ğurbanlı məlumat doəşe ki, çe Boku 134 qılə məcitədə monitorinq təşkil kardəşone ki, dini ayinon içra kardə əhali miğdari muəyyən bıkardon.
Im tədbiri nəticədə məlim bıə ki, Boku əhali 7-8% dini ayinon muntəzəm məçitonədə icra kardedə. Əmo ımən məlume ki, cəmiyyəti xeyli ğism ıştə kəonədə dini ayinon bə vırə rosnidən. Ğurbanlı votəşe ki, bı koədə bəvon hiç qıley məcburiyyət ni və bəvon hiç kəs noğsan qəte nibəzıne.
“Tolishmedia.com” sayt xəbə dodə ki, Mubariz Ğurbanlı sədrəti kardə Dini Komitə həmkaron de Daxili Koon Vəzarəti və Devlətə Əmniyyətə Xidməti bə ico Boku Suraxanı rayoni Ğaraçuxur ğəsəbə məcitədə reyd dəvuniəşone. Bə oşko bekardəşone ki, şəhrıvand Kamran Huseynzadə tərəfo dini ədəbiyyat ğeyri-ğanuni həvatə bedə. Çeyku 180 qılə dini məzmuninə ədəbiyyat musadirə kardə bıə.
“İslamazeri.com” saytən Nardarani hadisə məhbus, polison tərəfo de qolulə şikəst bıə Əbulfəz Bunyadovi azad karde ro internet platformadə kompaniya təşkil kardəşone. Sosialə şəbəkə fəalon Əbulfəzi moə çe Xeyriyyə Bunyadova bə Prezident İlham Əliyevi muraciət pevolo kardəşone, əhali dəvət kardedən ki, bə həmonə muraciəti tərəfdar beşon, bey ğol bıkəşon. Tosə iyunə manqi 7-minə rujən daxil hələ ki, 123 nəfər bə həmonə petisiya umjən qıniən və bey ğol noəşone.
Huğuğə mudafiəkar Oqtay Quləliyeviən çe Qəncə hadisə məhbuson məhkəmə orəxnə iclasi barədə xəbə doəşe ki, nəhayət hakimi həmonə hadisə video kəşemonon, həmən şəhəri muşahidə kameron kəşə materialon təğdim karde icazə doəşe. Im videomaterialonədə oşko vində bıə ki, ğatil Rəşad Boyukkişiyev dast`ədə ğəmə bemaneə, tənho bə meydon daxil bedə, bə 2 nəfər polisə zabirton hucum kəşedə, əvoni ğətl kardedə. Əv ım cinayətə əməli icra kardeədə ətrofədə mandə polisə nəfəron bey ğətiyyən mane bedənin. Hətto bey imkan dodən ki, əv bemaneə meydoni tərk bıkardo.
Quləliyev ğeyd kardedə ki, məhkəmədə de videokəşemoni numayiş karde ım ittihamon tamamən soxtə və bıhtonono ibarət bıe sənibəton subut bıe.
