Bokuədə ictimai nəğliyyati problemon.

Boku şəhərədə iştimai nəğliyyati problem və nırəsəyon həxədə Respublika KİV-ədə mutəmadi bə tənğidiə fikron rast omə bedə. Əmo həmonə mışğılon çand sorone ki, həll bedəni. Imən bə sərnişinon həxinə noroziəti səbəb bedə.

“Faktxəbər.com” de ım mevzu əlağədar nıvıştedə ki, Boku metropoliten çe paytaxti modern nəğliyyatə sisteme, əmo əv ısət qıley vəziyyətədəy ki, bə noxəşiə mənbə peqardə. Ruji pik saatonədə vağononədə nəfəs kəşe mumkun bedəni. Xususən tovıstoni qamə rujonədə sərnişinon arədə tanqənəfəsiku holyət kardəkəson miğdar ziyod bedə. Çand sorone ki, metroədə ventilyasiya sistem bərbad vəziyyətədəy, əmo bımi əloc karde zınedənin. Bə ım muəssisə 2 sor bə nav tojə sərdar təyin beədə əhaliku qıley umu bə əməl ome ki, metro problemon ıştə həlli peydo bəkarde, əmo çəvon umu bə puç beşe. Dəvardə sori avğustə manqədə metro bileti ğıyməti 50% boho kardeyən bə ım problemon əloc nıkardışe.

İğtisadşunas Qubad İbadoğlu votedə ki, dəvardə sori “Bakı metropoliteni” Sərpuşə Səhmdarə Cəmiyyəti mənfəət 60 milyon mənotisən vey bıə. Devləti tərəfoən bey 45 milyon mənot subsidiya, eskalator, vağon və co ovdonon hırie ro əlavən 44 milyon mənot vəsait doə bıə. İmən bə 2017-minə sori nisbətədə 30% veye. Demiən məlum bedə ki, metro nəğliyyatə sistemi mışğılon həll nıbıe səbəb maliyyə nırəsəyku ni.

Ekspert Elməddin Muradlıən ım fakti təsdiğ kardedə ki, jıqo problemon iqlə metroədə ne, çe paytaxti həmə nəğliyyatə sistemonədə heste. Avtobusonədə, marşrutə taksionədən jıqo beaburinə vəziyyət mevcude. Çimiən əsasə səbəb əlağədarə təşkilati rəhbəron bımi səhlənkar munasibət nişon doədəy.

“Sputnik Azərbaycan”ən xəbə dodə ki, “Bakı metropoliteni” SSC ıştə ponə sori maliyyə hesabat dərc kardəşe. Im hesabatiku jıqo məlum bedə ki,  muəssisə ponə sor de 54 milyon 870 həzo mənot ziyani bə sə jəşe. Umumən isə çey ziyani cəmi məbləğ 426 milyon 610 həzo mənot təşkil kardəşe.