Polison Qəncə məhbusi kədə dızdi kardəşone

De Qəncə hadisəon əlağədar odəmon dəstqir kardeədə polison çəvon kəonədə axtarış bardışone, ailə uzvon şəxsi telefon, planşet, kompyuteron həmən pulon peqətışone.

Isət çə vaxtiku 1 sor dəvardə, əmo həmonə əvecon bə çəvon soybon oqırdıniəşon ni. Qəncə məhbuson 7 nəfəro ibarət nevbəti qrupi məhkəmə icalsədə ki, Boku Sabunçu rayoni Qonə Cinayəton Məhkəmədə dəvardedə, vəkilon bı barədə vəsadət bə nav doəşone, əmo hakimi əv təmin kardəş ni, votəşe ki, istintaği materialonədə bı barədə sənəd ni. Muttəhim Abbas Abbaszadə valideyni tələb kardəşe ki, axtarışi vaxti polison çey kədə 1 həzo 500 avro pul peqətışone, tosə ısət oqırdıniəşon ni. Polison 2015-minə sori Nardarani məhbuson kədən jıqo hərəkətşon kardəbe: kədə çəvon pulon peqətəşonbe, oqırdıniəşon nıbe.

Meydan TV Qəncə hadisə məhbusonədə 53 sinninə Aydın Ğurbanovi Penitensiar Xidməti Mərizxonədə vəfot karde həxədə xəbə doəşe. Xeyli vaxtbe ki, çey jimoni həmro Məhbubə Ğurbanova bə devlətə orğanon Aydıni bə qonə noxəşi mubtəlo bıe, və ey hiç nıbo bə kə dustəğəti vadoe barədə xahişon kardedəbe. Orəxnə məhkəmə iclasədə hakim  Azər Tağıyevi bə Ğurbanovi votəşbe ki, “az vindedəm ki, ıştı vəziyyət qone, mardedəş, əmo tıni azad karde nibəzınem.”

Məhbubə Ğurbanova bə muxbiri votəşe ki, Aydıni hovə zoə Hamlet dəstqir kardışone. Aydıni çey mudafiə ro vəkil qətışe, həmişə çey tono şedəbe, bo eyo xorək bardedəbe. Polisi rəis çimiku bə rık dəqınie, de quya ıştə kədə silah niyo karde maddə bə Aydıni şər ğandışe bə əvşən dəstqir karde.

Az.R polison bə şəhrıvandon divon qəte barədə KİV-ədə rə-rə jıqo fakton nıvıştə bedə. Meydan TV Xaçmaz şəhrıstoni sakin Eldar Hacıbalayevi Ğuba polison tərəfo çey 6 sınninə əğıli çəşi vədə çoko bənə həvəşion kue fakt bə cəmiyyəti nəzə rosniəşe. Həmonə hadisəku 1 manqisən vey vaxt dəvardə, əmo tosə ısət bə Hacıbalayevi şikayəti hiç qıley əncom kəşə bıə ni.