Çe Az.R təbii monopolistə şirkəton boçi de ziyani ko kardedən

Az.R-ədə bənə “Azərenerji”, “Azərişıq”, “Azərkosmos”, “Bakı Metropoliteni”, Azərbaycani Osınəroon, Azərbaycani Həvo Roon xeyli təbiiə monopolistə şirkəton hestin. Təbiiə monopolist ifadə mənan ıme ki, yəni keşvəri iğtisadiyyati həmonə sahədə 1 qılə şirkət fəaliyyət nişon dodə, çey konkurent nişe.

Əmo Az.R-ədə haliyədə real vəziyyət sivilə iğtisadiyyatinə məmləkətonku xeyli fərğ dodə, imən çimədə ibarəte ki, Az.R təbiiə monopoliston həmə beistisna de ziyani ko kardedən, və har sor çe devlətiku de çand da milyonon dotasiya sedən. Soron dəvardedən, əmo bə çəvon ım mərəzi çarə peydo bedəni, ım tufeyliə muəssison devləti budcə bənə duşoə moli eduşedən.

Boku Metropoliteni dəvardə sor de 55 milyon mənot ziyani bə sə jəşe. Devlətə budcəku 49 milyon mənot subsidiya səşe.

“Azərkosmos”i ponə  sori ziyan 6,5 milyon, pionə sori ziyan isə 16 milyon mənot bıə. Çey ıştə fəaliyyəti bino kardə 2010-minə soriku jıqoşə bə devlətə budcə jə ziyan cəmi 313 milyon mənot təşkil kardəşe.

“Azərenerji” 2018-minə sorədə 307 milyon mənot ziyan kardəşe. 2017-minə sori ziyan isə 602 milyon mənot bıə. İm 2 sorədə devlətiku 196 milyon mənot subsidiya səşe. İğtisadşunas Natiğ Cəfərli ım ziyani səbəbon barədə Meydan TV bey doə parsi cəvobədə votəşe ki, çimi səbəbi peydo karde ro, bə ım muəssison rəhbəriyyəti boştə inşa kardə villaon, biznesə obyekton, bohoə avtomobilon, bə çəvon ailə uzvon brilliantə ziynətə əşyaon diə karde lozime.

Azərbaycani Osınə Roon Sərpuşə Səhmdarə Cəmiyyətədən vəziyyət ım curəy. Dəvardə manqədə ım muəssisə Belorusiyaku vağoni qıləy bə 15 milyon dollar hırie barədə ifşakardə fakt “Azadlıq.info” sayti bə cəmiyyəti rosnişe. Xariciə mənbəonku məlum bə ki, Rusiya və Polşa həmonə markaninə vağonon bə 1milyon 700 həzo dollar səşe, əmo Azərbaycani muəssisə eyni vağon bə 9 ğat bohoə ğıymət hıriəşe. Hejo iqlə ım fakt  Az.R təbiiə mononopolistə muəssison har sor boçi de ziyani ko karde səbəbi oşko bə dim bekardedə.