Nardarani məhbus bə azadi beşə
Nardarani məhbus Əbulfəz Bunyadov çe zindoniku azad kardəşone. İm xəbə bə “Report” sayti çey vəkil Fəxrəddin Mehdiyevi votəşe. Bunyadov polisi jə qolulə nəticədə şikəst bıə. Jiqo vəziyyətədə məhkəmə əv bə 15 sornə zindonə cəzo məhkum kardəşbe.
Nardarani hadisə co qley məhbus Əliəsqər Cabbarovən 2 sor 3 manqnə zindonə cəzo orəxə bəpeş çe zindono vadoəşone. Bə rəsmi məlumati əsasən Cabbarovi soədə ğeyri-ğanuniə silah peydo kardəşonbe. Əmo əv ım ittihamon bıhton bıe votedəbe və ey rədd kardedəbe, ıştə dəstqir və məhkum bıe de çey dini fəaliyyəti obastedəbe.
Çe Boku Sabunçı rayoni Qonə Cinayəton məhkəmədə Qəncə hadisə məhbuson 8 nəfəro ibarət qrupi muhakimə dəvom kardəşe. Məhkəmə iclasədə hokuməti tərəfo təyin bıə vəkilon ıştə vəzifə deni lazımi ğaydədə icra nıkarde bə oşko beşə. Muttəhimon tələb kardəşone kİ, çəvon ım vəkilon boon məhkəmədə ifadə bıdon. Çunki istintaği vaxti əvoni daima kudəbin, işqəncə dodəbin, vəkilon ım fakton bə ğeyd se, və ya bı barədə şikat kardeku imtina kardedəbin. Əmo hakimi ım vəsadət təmin kardəş ni.
16 sinninə məbus Emil Məmməovi votəşe ki, “ıştə vəkil- Xaqani Məmmədoviku xahiş kardıme ki, bəmı işqəncə doe barədə bə penə orğanon şikat bınıvışto. Ey votışe ki, eyb əkəni, bə ittihamə akti ğol bıkəş, peşo şikat bəkardemon. Əmo ey bı roədə hiç ko nıvindışe.”
Muttəhim Vuğar Yusifovi votəşe ki, əv iyulə manqi 10-minə ruji Qəncə hadisonku 13 ruj bə peş , iyuli 23-ədə dəstqir kardəşone. Əqər çey taxsiş bıəbe, ım muddətədə çe məmləkəto beəşi əşi bə xaric. İyuni 10 mitinğədə hiç qıley iştirak və fəaliyyətış bıə ni. Kənoədə mandə, təmoşo kardəşe. Qirəm zınəş bıəbe ki, hadisəon kənoku muşahidə karde cinayəte, jəqo həmonə 13 ruji muddətədə məmləkəti tərk əkey.
8 nəfəro ibarət həmonə qrupi məhkəmə dəvom bəkarde.
