Məvacibon ziyod nıbə, ğıyməton boho bedən

Prezident İlham Əliyevi minimum məvazibi bə 250 mənot ros karde barədə fərmani icra çe sentyabrə manqi 1-ku bino karde analitikon arədə jiqo qıley ray bə əməl vardışe ki, ım 3 manqi muddətədə monopoliston vıjoronədə ğıiyəmton anədə boho bəkarden kİ, həmonə ziyod kardə məbləğ orəx nəticədə bə çəvon cifon ru bəben.

Isət, məqəvuji təhlilqəron doə proqnoz sərost beşedə; Respublika vıjoronədə ərzaqi qıyməton rujbəruj boho bedə.

Milli Məclisi mətbuə orğan “Azərbaycan” rujnomə bə ım problemi qıley məğalə həsr kardəşe. Bı məğalədə ğeyd kardedən ki, iminə kərə ni ki, prezidenti məvacib və pensiyon ziyod karde barədə doə sərəncamon mirəkkəb hışk nıbə, vıjoronədə ğıyməton dərinsaat boho bedə. İsət vıjoronədə 2 rujədə bə 1 nev məhsuli eyni ğıyməti rast ome bedəni. Məhsulon har ruj kamən bıbo tədricən boho kardedən. Meyvə, tərəvəz, qujd, ruən, kolbasa , çay, şirniyyati ğıymət rujbəruj ziyod bedə.

Əmo təəssuf ki, məğalə muəllifi jiqo ğıymət siyasəti əsil səbəbi bə zıvon varde curətış rəsedəni, təklif kardedə ki, bələdiyyə idarə həmkaron bəpe de jiqo suni bohoçiəti mubarizə bıbardon.

Əsil  həğiğətədə isə vıjoronədə ğıyməton suni boho bıe əsasə səbəb daxili və xarici ticarəti tamamən çe i qrup monopoliston dastədə bıeye. Im qrupi odəmon çe Prezidenti ailə nezə əvlodono ibarətin. Hejo çəvon bə devləti Ali ğanundoə orğani , yəni bə Milli Məclisi təzyiği nəticəy ki, 13 sore “Rəğabəti həxədə məcəllə” ğəbul bedəni. Im ğanuni layihə 2006-minə sori bə parlamenti təğdim bıə, 2 kərə muzakirə kardəşone. Bə naməlumə səbəbon qorə çey muzakirə və ğəbul tosə ısət bə təxir eğandəşone. Bı dəvardə soronədə kali deputaton çand kərə ım məsələ aktual karde piəşone, əmo Parlamentədə nıştə toyfəbazə deputaton mutləğ əksəriyyət təşkil karde səbəbiku, ım məsələ tosə ısət həll bəni. Bə hakim toyfə mənsub monopolistonən əhali məvacib və pensiyon ziyod bıəcəğin, əlbəsaat qıyməton ros kardedən, demiən həmonə pulon bə əhali ne, bə toyfəbazə monopoliston cif ru bedə.