SOCAR-i pulon bə kovrə xarc bedə

Ponə sori Azərbaycani Devlətə Natə Şirkəti, yəni SOKARİ Kaspi dıyoədə tojə natə çol`on kande və bə “Azərenerji” ıştə ğarzi avjor karde ro devlətə budcəku 959 milyon mənot vəsait səşe.

Bə vaxti MM deputaton Vahid Əhmədov və Əli Mənsimli parlamentədə ım məsələ muzakirə beədə bımi etirazən votəşonbe ki, devləti bə SOKAR-i dotasiya doe bə sə dəşə ko ni. Bənə SOKAR-i devlətə şirkəton bəpe bə budcə vəsait ovoştınon, devlət bey kompensasiya doənin ni.

Isət məlum bedə ki, şirkəti ğarzon miğdar bə 10 milyard dollari neze. “Azadlıq.info” sayt jıqo qıley pars bə miyon nodə: Nat həvateku ğəzənc kardə pulon bey şin? Həmonə pulon ofşoronədə onoə  şirkəton, dəbdəbəninə villa və mılkonədə, SOKAR-i rəhbəriyyəti ailə uzvon ləl-cəvahiratonədə axtar karde lozime. Anədə milyardi bə vo doə ım şirkəti rəhbəriyyət ısətən ıştə nəzə bə devləti budcə pulon bastəşe. Im sori əvvələdə Maliyyə Vəzarəti elan kardışe ki, bo SOKAR-i nizamnamə kapitali ziyod karde ro 481 milyon mənot co kardəşe.

Əmo çe Az.R əsasə natə şirkəti maliyyə, məğəvuji anəhoyən muflis  vəziyyətədə nibən. Dəvardə manqi əvvəlonədə xəbə beşe ki, SOKAR-i Rusiyadə Antipinsk Natə emalə zavodi hırie fikrış heste. Isət ım zavod muflis vəziyyətədəy. Çey kreditor Sberbank əv həvate pidəşe. “Radio Azadi” xəbə dodə ki, sıvoy SOKAR-i “Rosneft” bə “LukOyl” şirkətonən bey marağ nişon dodən. “Sputnik Azərbaycan” bə Rusiya “Kommersant” rujnomə istinadən Sokari de Sberbanki hətto de ım məğsədi muştərəkə muəssisə onoeyən xəbə doəşe.

De ım məlumati əlağədar sayti muxbiri bə SOKAR-i Boku ofisi çand kərə zanq jəşe, əmo çəğono ım fakt nə təsdiğ, nəən təkzib kardəşon ni.

Əlavən ğeyd karde lozime ki, Az.R ım natə şirkəti Turkiyədə dıjdə STAR natə emalə zavod hıriəşe və bımi 6 milyard 300 milyon dollar vəsait xarc kardəşe.