Az.R mustəğilə KİV mevcud nıbə məmləkəte

Çe Avropa Əmniyyət və Həmkarəti Təşkilati (AƏHT) bə Kutləviə İnformasiya Vasiton aid numayəndə Arlem Dezir ım təşkilati bənə Az.R kali devlətonən dəvət kardəşe ki, bə mustəğilə KİV-on vanqi tosniə əməlon orəx bıdo.

“Nur-az.com” bə “Turan”i istinadən xəbə dodə ki, Dezir`i iyuli 25-minə ruji  Amerika Konqresiədə ıştə votemonədə ğeyd kardəşe ki, “Azərbaycanədə vəziyyət əməni norohət kardedə, pidəmone ki, əv bəştə səpe peqətə ehdədarion əməl bıkardo”. Ey həmən votəşe ki, haliyədə Az.R -ədə mustəğil nə qıley televiziya, nə radio, nəən  mətbuat ni. Hokuməti bə KİV-on repressiya zumand kardəşe, mustəğilə informasiya sayton dəbastəşe. Azərbaycanə zıvonədə mustəğilə İnformasiya vasiton xarico pevolo bedən. Bə AƏHT uzv devlətonədə jurnalist bəpe bə zindon dənoə nıbo. Əmo Az.R de Turkiyə bı koədə sıftənə 2 qılə vırə qətedən.

“Tolishmedia.com” saytən xəbə dodə ki, bə Bəşəri Huğuğon dair Avropa Məhkəmə bo zərərdidon təyin kardə təzminat çe Boku hokuməti tərəfo ya avjor bedəni, yaan ki, ğismən avjor bedə. Bı barədə Avropa Şura vəziron komitə bə həmonə məhkəmə şikayət hozo kardəşe. Əliyevi hokumət isə həmonə təzminaton tamamən bə zərərdidon avjor bıe iddia kardedə.

İyili 25-minə ruji bə Bəşəri Huğuğon Dair Avropa Məhkəmə Boku hokuməti vədə qıley tojə tələb noəşe ki, 2011-minə sori Bəşəri Huğuğon Klub nomədə Qeyri Hokumətə Təşkilati de bə ğeyd seku imtina karde səbəbi bə ım təşkilati soxte təşəbbus kardə Rəsul Cəfərovi 6540 avro kompensasiya avjor bıkardo.

Vəkil Aqil Layıc`i bo Azadi Radio qəp jəşe ki, ısət nəinki bə Avropa Məhkəmə vığandə, həmən çəğono omə məktubonən qin bedən. Bı barədə bə “Azərpoçt”i kardə muraciətonən be cəvob mandedə. Jıqo fakt vəkil Əsabəli Mustafayeviən təsdığ kardəşe. Əvon qımon kardedən ki, hokumət ım məktubon çe ğəsdo dəpişnidə ki, bə Avropa Məhkəmə Boku hokuməti ğeyri-ğanuniə hərəkətonku şikayətə məktubon nırəso.