“Milli Şura” Az.R-ədə faşizm və seqreqasiya siyasəti mevcud bıe etiraf kardışe
Az.R “Milli Şura” nominə muxalifə təşkilati dəvardə rujonədə məmləkətədə de siyasiə vəziyyəti qıvonin bıe əlağədar bəyanat pevolo kardəşe. “Azadlıq.info” dərc kardə həmonə sənədədə votə bedə ki, “Azərbaycani hokumət ısət çe Tojə Azərbaycanə Partiya tərəfo idarə bedə, məmləkətədə faktiki təkpartiyaninə sistem bərğərore.
Əsasə muxalifə Xalğə Cəbhə Partiya isə çe ofisiku məhrume, bə çey fəalon hətto çayxonədə ıştə qırdbemoni dəvunie imkan dodənin. Hokumət bə şəhrıvandon munasibətədə siyasi əlaməton qorə tərəfkeşəti və ğərəzkorəti kardedə. Siyasiə məhbuson bə qonə işqəncon məruz oqətedə. Məmləkətədə demokratikə təsisaton məhv kardəşone, demiən bə diktatura ovaşte ro zəmin hozo kardə bedə. Nardaran, Qəncə, Tərtər hadison de hokuməti senari təşkil kardəşonbe, çımon nəticədə canədə beqınoə odəmon kıştə və ya bə zindon dəğandə bıən.” Bəyanati orəxədə “Milli Şura” Avropa ictimaiyyəti vanq kardedə ki, Az.R-ədə faşizm, diskriminasiya, və seqreqasiya təzahuron vəy se ro təcili tədbiron bıvindo, xalqiən dəvət kardedə ki, faşizmi inkişafi vəy se ro bə kutləviə etirazə mubarizə ros bıbon.
İyo ğeyd karde vacibe ki, Az.R-ədə faşizm və seqreqasiya, yəni bə cəmiyyəti i ğismi dini, irği və ya etnik əloməton səbəbiku diskriminasion siyasət tətbiğ karde i ruji, i manqi, hic i sori muddətədən bə meydon beşə ni. Im siyasət hələ 1992-minə sori AXC-Musavat tandemi bə hakimiyyət omə rujiky , Ostoro Şahağaci diədə qıley xeyzoni kəy vironə, çey uzvon bəji-bəji kulət, Tolışıstoni ərbobə odəmon molı-mılkon ğarət kardə rujiku bino bıə. Əliyevon hakimiyyəti vaxtonədə “Milli Şura” rəhbəron- Cəmil Həsənli, Əli kərimli, Qultəkin Hacibəyli parlamenti uzv bıən və de çəvon iştiraki xeyli antikonstitusion və antidemokratikə murtəce ğanunon ğəbul bıə. Məmləkəti bumiə xalqon çe Respublika ictimai-siyasiə jimoniku tamam rədd kardəşone və muxalifəti bımi hiç vaxt etiraz kardəş ni. Isət nubə omə bə çəvon ıştəni rəsə. Faşizm və seqreqasiya ıştə səy səpe hiss kardə bəpeşt əvon çey mahiyyəti dərəsən və Avropa ictimaiyyətiku komək pidəşone. Əmo Avropa siyasi daironən Az.R-ədə faşizmi bərğəror beədə ısətnə muxalifətiən canədə qınokar bıe yəğin ki, çok zınedən.
