Azərbaycanıjon boçi çe vətəno vitedən
Boku hokuməti rəsmiyon daima bəyon kardedən ki, əvon ıştə şəhrıvandon barzə jimonə səviyyə təmin kardəşone, bekorəti və becizəti Avropa miğyasədə ən jinə səviyyədəy. Əmo real vəziyyət tamam co çiyon bə oşko bekardedə.
Meydan TV Az.R-ku bə Avropa fərar kardə azərbaycanıjon miğdari barədə qıley məğalə çap kardəşe. Əyo votə bedə ki, 2016-minə sori bə Almaniya dəvitə azərbaycanıjon miğdar bə 2015-minə sori nisbətədə 3 kərə ziyod bıə, bə 4750 nəfəri rəsə. 2019-minə sori sıftənə 6 manqədə Almaniya hokumətiku pənahroh piə Boku hokuməti şəhrıvandon miğdar 999 nəfər bıə. Im 6 manqədə Respublikaku vitə 1400 nəfəri ərizə diə kardəşone, çəvonədə cəmi bə 6 nəfəri pənahqoh, 46 nəfəri fərari status doəşone. Cəmi 74 nəfəri ərizə musbət cəvob səşe. Əmandənə 1326 nəfər çe Almaniyaku deport bənine. İğtisadşinas Natiğ Cəfərli fikir jıqoe ki, orəxnə soronədə məmləkəti tərk kardəkəson miğdari ziyod bıe səbəb, bekorəti, iğtisadi behran, quzərani qıvonin bıe, həmən siyasi təğibon zumand bıeye. Kuçkardəkəson istiğamət əsasən bə Turkiyə, Almaniya, Çexiya, Rusiya və Kanaday.
De deport ğərori dimbədim mandə azərbaycanıjon arədə intihar, bəştə zəfə rosnie, bə polison muğavimət, hətto miqrasiya xidməti bumiə həmkaron qirov peqəte halonən rast omə bedə. Orəxnə 3 manqi dılədə 7 nəfəri bə Azərbaycan deport nıbe ro bəştə ğəsd kardəşe.
Qıleyən marağinə cəhət bımədəy ki, Boku hokuməti təbliğatə vasiton daima Avropada əhali sosial problemon və mışğılon, Azərbaycanədə isə hokuməti bo əhali firəvanəti ro səy nişon doe barədə qəpon jedə. Əliyevi hokumət əqər həğiğətən bəştə şəhrıvandon tənəvəc mandedəbu, hələ ım odəmon vətəniku fəror karde bə itərəf bımando, bəs əvon bə məmləkət oqarde boçi pidəşon ni? Bə ıştə jimoni ğəsd karde bə vətən oğardesə əfsəl zınedən?
