Az.R-ku iminə Həcci kərvon bə Məkkə dəro qınie

Avğustə manqi 2-minə ruji 180 nəfəro ibarət azərbaycanıjə zəvvaron iminə dastə çe Bokuku bə Həcc ziyarət dəro qıniən. Tosə avğusti 5-i har ruj de 2 qılə həvopeyma reysi 1400 nəfər zəvvar Respublikaku bə ziyarət dəro vığandə bəbe.

Bı səfərədə əvoni 40 nəfər bələdçi muşayət bəkarde. Zəvvaron sıftə bə Ciddə şəhər varid bəben. Çəyoən 90 kilometr ro bəşen bə Məkkə bərəsen. Əyo Umrə əməli icra bəkarden. Çey bəpeş Həcc bino bəbe. Çe ğəməri təğvimi Zilhiccə manqi 9-ədə bə Ərəfati band pebətaten. Manqi 10-də ğıbon obəbırien. 2 şəv Minadə mandə bəpeş bə Məkkə obəqarden. Əyo əmandənə Həcc əməlon icra bəkarden, çəyonən bə Mədinə dəro bəqınien. Avğusti 22-ku tosə 26-i bə Vətən obəqarden. Azərbaycanıjə zəvvaron ən ohili 80, ən cıvoni 19 sinn hestışe. Çəvon umumi miğdari 40% zənənono ibarəte.

Ğəfğazi Mısılmonon İdarə məlumat doəşe ki, ımsor Az.R-də Ğıbonə idi avğusti 12 və 13-minə rujonədə ğeyd bəkarden. Bə “Azadi Radio” doə məlumati əsasən, orəxnə soronədə bə Həcc şəkəson miğdar umumən saru eqıniə. 2015-minə sori 2400 zəvvar bə ziyarət şəbe. 2017-ədə çəvon miğdar 900, 2018-də 1440 nəfəro ibarət bıe. 

Eyən bıvotəmon ki, ımsor bo Az.R şəhrıvandon kvota 1400, yəni ponə sorisə 40 nəfər kam co kardəşonbe. Ğıymətən dəvardə sorisən 75 dollar ziyod, yəni 4225 dollare.  

Bə Dini Təşkilaton dair Devlətə Komitə sədr Mubariz Ğurbanli bə APA votəşe ki, jiqoşə bə həmə İslamə muğəddəsə ocəğon kollektiv ziyarət de Ğəfğazi Mısılmonon İdarə rəhbərəti təşkil kardə bəbe.