İmişli rayoni dion sosialə problemon
İyulə manqi 31-ədə prezident Əliyevi bə sosial-iğtisadi məsəlon dair muşavirə dəvunişe. Bənə har səfəynə mışaviron, bı səfən ey bə məmləkəti hartərəfinə inkişafi dair pozitiv fikron votışe, hətto ğeyd kardışe ki, iğtisadiyyat de rekordə qəmon bə nav şedə.
Əmo çand sorone ki, devləti məmuron daima tarifinə qəpon jedən, zəhmətkəşon quzərani mışğılon isə həll bedəni. Meydan TV bə əhali sosialə problemon dair ıştə nubəti məğalə bə İmişli şəhrestoni Hacırustəmli diy sakinon məşəğğətinə jimoni həsr kardəşe. Im diy 1500 nəfər sakinış heste. Çəvonədə Tapdığ Həsənovi bo muxbiri qəp jəşe ki, divojon məişət anədə qıvonine ki, cıvonon sə peqətedən çe diku beşedən şedən. Diy roon bərbad vəziyyətədəy, ğaz okırniəşon ni, de balonə ğazi həm xorək patedəmon, həmən zımıstonədə kəy tosponidəmon. Peşomə ovi lulə tojə okırniə bıə, əmo ovi de fasilə dodən. Məktəb soveti vaxtonku inşa bıə, ısət vılo bedə. Əğılə bağçə ni, tibbi məntəğə ni, aptek ni, ictimaiə nəğliyyat ni. Roon bərbod vəziyyətədə bıe səbəbiku Təcili tibbiə komək bə di omedəni. Çand sor bə nav tibbi məntəğə inşa kardəşone, əmo tosə ısət əv ko kardedəni. Odəmon bo hırdə tibbiə koməki ro bə hamsuə dion və ya bə rayoni mərizxonə muraciət kardedən.
Əhali əsasən de pambə və taxıl perosnie məşğul bedə. Əmo hokumət çəvonku ım məhsulon bə qıley ğıymət hıridə ki, bə çəvon kəşə zəhməti qınidəni. Diədə tosə ısət bankomat noəşon ni ki, pensioneron ıştə pensiya rohət se bızınon. Im ohilə odəmon bımi ro dee bə rayoni mərkəz şe məçburiyyətədə mandedən.
İmişli rayoni İcra hakimiyyətiku de ım problemon əlağədar votəşone ki, əvon çımonku xəbədon, ımoni diğğətədə oğətedən, nezə soronədə tədricən həll bəkarden.
