Az.R-ədə de Ğıbonə idi əlağədar tədbiron

Navədə İslamə dini əlamətinə rujonədə qıley- Ğıbonə id omedə. Ğəfğazi Mısılmonon İdarə elan kardəşe ki, bə çəmə məmləkəti ufuğədə Zilhiccə manqi ovşumi muvafiğ ım manqi 10-minə ruj bə Miladi təğvimi avğustə manqi 12 muvafiğ omedə. İdarə de ım idi əlağədar ıştə tevsiyyəon bə əhali nəzə rosniəşe, ım idə mərasimi ğaydə-ğanunon i kərən bə cəmiyyəti yod vardəşe.

Respublika Ğida Əmniyyəti Aqentiyyəti, Di Təsərrufati və Daxili Koon Vəzarətiən bahəm bəyonat pevolo kardəşone. “Sputnik Azərbaycan” xəbə dodə ki, hokuməti ım təsisaton ğıbonə heyvonon bə sanitar qiqiyenik ğaydə və tələbon muvafiğ, baytarə muayinəku dəvuniə bəpeş, hokuməti muəyyən kardə xususiə vıronədə obırnie məsləhət zınəşone. Ğeyd kardəşone ki, kuçəonədə, parkonədə, roə kənoonədə və diqər ictimaiə vıronədə bə ım mərasimi icra karde ro doe əbıni.

 Bo ğıbonə mərasimi icra karde ro respublikadə hokuməti tərəfo 44 qılə stasionar və 30 qılə çodoə obırniə məntəğəon bə əhali istifadə bədon.

Avğustə manqi 12 və 13-minə ruji ki, Respublikadə Ğıbonə id ğeyd bəkarden, Di Təsərrufati Vəzarəti de “Diku və şəhər” nomi 30 qılə vırədə yarmarka təşkil bəkarde, çəvonədə 19 qılə Bokuədə obəno. Əyo   ğıbonə heyvonon həvate təşkil bəkarde ki, ğıyməton suni şəkilədə ziyod karde vəy bısəno. Im tədbirədə de 160-180 mənot ğıyməti tosə 20 həzo pəsi bə savdı bekarde nəzərədə qətə bedə.

Boku Beynəlxalğə Avtovağzalə Kompleksən de Ğıbonə idi əlağədar hozoəti tədbiron vindəşe. Çe avğusti 7-ku tosə 14 bə rayonon şə avtobusə reyson miğdar ziyod kardəşe, bə ım rujon 10 ruj bə nav bileton həvate bə ğaydə eğandəşone. Əhali “on-layn” ğaydədən bileti de “avtovağzal.az” sayti vasitə hırie imkanədə bəbe.