Siyasi məhbus, jurnalist Polad Aslanovi səhhət qıvonin bıə

“Xəbərman.com” sayti redaktor, siyasiə məhbus Polad Aslanovi səhhətədə problemon bə əməl omə. Bı barədə bə Azadi radio çey jimoni həmro Qulmirə Aslanova qəp jəşe. Ey votəşe ki, Poladi dıl`ə noxəşiş heste. Doxtoron omedən bey diə kardedən, “hiç problem ni” votedən və beşedən şedən.

Polad Aslanovi deştə dəstqiri ğeyri-ğanuni bıe əlağədar bə respublika Sər prokuratura və Devlətə Əmniyyətə Xidməti muraciət kardəşe, əmo çəğono bey cəvobşon doə ni. Çey mualicə nıkarde barədən bə Renitensiarə Xidməti kardə şikayət becəvob mandə. Gulmirə Aslanova əlavən ğeyd kardəşe ki, Poladi bə zindon dənoe de çey jurnalistə fəaliyyəti əlağədare, çunki əv Devlətə Əmniyyətə Xidməti həmkaron rışvəxorəti ifşa kardedəbe, bə səbəbən əvon ısət çeyku ğisas sedən, əvşon zindonədə kışte məğsəd heste.

Avğustə manqi 6-ədə Boku Apelyasiya Məhkəmə Polad Aslanovi bə kə dustəğəti vadoe məsələ diə kardəşe, Səbayil rayoni məhkəmə ğəror təsdiğ kardəşe, yəni çey bə kə dustəğəti vadoe təklif təmin kardəş ni. Im prosesi bəpeş Qulmirə Aslanova bə Meydan TV votəşe ki, məhkəmə hakimon de sifarişi ko kardedən, bo ədalətinə ğəror bekarde ciqəşon rəsedəni. Az.R Konstitusiyadə təsbit bıə ki, har şəhrıvandi bəştə nezə odəmon əleyh ifadə nıdoe huğuğ hestışe. Əmo mustəntiğ devləti  Əsasə Ğanuni bəmə doə ım huğuği darıştedə. Mıni və çımı həsuə bə istintağ vanq kardedə. Əmə ım huğuği bə çey yod vardeədə əv votedə ki, “ğanun çiçe? az çı cur bəpime jəqoən bənine.”

Eyən bıvotəmon ki, Polad Aslanov Devlətə Əmniyyətə Xidməti tərəfo iyuni 12-ədə dəstqir bıə. Ey de bə devləti xəyanət maddə ittiham kardedən. Im maddədə bo muttəhimon tosə 20 sori zindonə cəzo nəzərədə qətə bedə. Aslanov ım ittihami rədd kardedə, ıştə jurnalistə fəaliyyətədə çəvon rışvəxotəri təhğiğ karde səbəbiku bey ım ittihami bə nav doe votedə.