Azərbaycanədə Ğıbonə id ğeyd kardışone

Avğustə manqi 12və 13-minə rujonədə Azərbaycanədə mubarəkə Ğıbonə id ğeyd kardışone. Ğəfğazi Mısılmonon İdarə mətbuatə xidməti bə “Sputnik Azərbaycan” sayti məlumat doəşe ki, İdə nomoj sıftə maştəvoni saat 8 təmomədə Əjdərbəq məcitədə votəşone. Çəyo saat 9-ədə Tojə Pir və məmləkəti əmandənə məçitonədə icra kardəşone. Məmləkəti çand sa həzo insonon bə məciton omən nomoj votəşone, dıvo kardəşone, de ım muğəddəsə idi munasibəti bə yəndı çəşruşini doəşone.

Ğıbonə id islami ən əzəmətinə tədbirono qıleye. Im id Rujəmo orəxe 70 ruji bə peş 3 ruji muddətədə ğeyd kardə bedə. Bə islami ğaydəon əsasən, har imkaninə mısılmonə ailə bəpe qıley pəs, bız, qo və ya dəvə obırno, çey qujdi bə fəğır-fuğəra və bəştə nezə əvlodon baxş bıko.

Ğıbonə id çe insonon bə Xıdo bovə və dəruniə etiğadi qıley numunəy. Im id İbrahim Peyğəmbəri ıştə zoə İsmaili  Xıdo roədə bənə ğıboni obırnie barədə çe Xıdo əmri de sədağəti icra karde hozo bıe və bı sədağəti qorə Xıdo tərəfo bımi ro qıley pəsi ğeybo vığande hadisəku bə meydon omə. Bı səbəbən bey İsmayıli ğıbon votedən. Im hadisə dini tarixədə nığılə riz noəşe və  ey nişon dodə ki, insonon bə Xıdo bəpe nığılə məhəbbətşon bıbo, ım məhəbbətədə bəpe səmimi və dılısoxt bıbon.

Azərbaycanə Respublika mustəğil bıe bə peş Milli Məclisi 1992-minə sori oktyabrə manqi 27-ədə məmləkəti idon həxədə ğanun ğəbul kardışe, bə həmonə ğanuni əsasən Respublika mısılmonə şəhrıvandon har sor Ğıbonə id devləti səviyyədə ğeyd kardedən.