Apelyasiya məhkəmə Qəncə məhbuson cəzo bə kam kardəşe

Avğusti 9-minə ruji Boku Apelyasiya Məhkəmə bə Qəncə məhbuson 11 nəfəro ibarət qrupi apelyasiya şikayəti diə kardəşe. Çəvon məhkəmə ımsori fevralə manqi 22-də orəxəbe, əvonşon çe 7 soriku tosə 10 sor muddət bə zindonə cəzo məhkum kardəbe.

Apelyasiya məhkəmə ım hukm ləğv kardəşe, 7 nəfəri cəzo muddət 4 sor 6 manqiku tosə 6 sori, 4 nəfəri cəzo isə 1 sor muəyyən kardəşe. Həmonə 4 nəfər Huseynov Ğadir, Məmmədtəğiyev Kamal, Seyidov Mireşqin və Qurbanzadə Raufi ım muddətədə zindonədə bıe, yəni cəzo muddət bə orəx rəse səbəbiku bə azadi beşən.

Qəncə məhbuson co qıley qrupi apelyasiya məhkəmən dəvonış heste. Im qrupi məhbusonən 7 soriku tosə 9 sori zindonə cəzo səşone. Prokurori  çəvon cəzo  çe 4 sor 6 manqiku tosə 5 sor 6 manqi saru eğande təklif kardəşe. Vəkilon isə bə muttəhimon bəraət doe tələb kardəşone. Im məhkəmə proses hələ bə orəx rəsəni.

 Azadi radio xəbə dodə ki, de Qəncə hadison əlağədar bə 80 nəfəri əleyh cinayətə ko bino bıə. Çəvonədə 11 nəfər axtarışədəy. 60 nəfəri barədə 8 qrupi istintağ bə orəx rəsə, ısət məhkəmə bə çəvon koy diə kardedə. 6 qılə qrupi ko orəxə, 44 nəfəri barədə ittihamə hukm elan kardəşone. 16 nəfəro ibarət 2 qrupi məhkəmə dəvom kardedə. Yunis Səfərov ki, Qəncə səhəri sərdarış de qolulə jəbe, çey istintağ hələ bə orəx rəsəni, nə respublika huğuğə muhafizə orğanon, nəən məmləkəti Mass media çey vəziyyəti barədə xeyli vaxte ki, hiç qıley məlumat dodənin.

Dəvardə rujonədə “Azadlıq.info” sayti İslamə Partiya Ostoro təşkilati sədr, siyasiə məhbus Ruhulla Axundzadə səhhəti qıvonin bıe barədə xəbə pevolo kardışe. Bi barədə çey nezə əvlodon bə redaksiya məlumat doəşone. Axundzadə 2011-minə sori yanvarə manqiku zindonədəy. Boku məhkəmə əvış bə 11 sor 6 manqinə zindonə cəzo məhkum kardə. 2013-minə sori çey dıl`ədə cərrahiyyə əməliyyat bardəşone.