Çe Qəncə məhbuson məhkəmədə dave eqıniə

Avğusti 15-minə ruji Boku Apelyasiya Məhkəmədə Qəncə məhbusonədə bə 11 nəfəro ibarət qrupi şikayəti diə kardəşone. Navonə - Qəncə Qonə Cinayəton Məhkəmə bo əvon 7 sor 6 manqiku tosə 9 sor zindonə cəzo bıriəşbe.

Vəkilon bəvon bəraət doe xahiş kardəşonbe.  Apelyasiya məhkəmə məhbuson ım cəzo muddət bə kam kardışe, bə 4 sor 1 manqiku tosə 5 sor eğandışe. Im, bə məhbuson və çəvon nezə əvlodon ki, ım məhkəmə iclasədə iştirak kardedəbin, şiddətinə etirazi səbəb bıe. Polison ım iğtişaşi vəy se ro bə məhbuson ki, ğəfəsi dılə`də nıştəbin, hiç vırə şe imkanədə nıbin, həmən zalədə bıə odəmon çəştovniə bibərə ğaz peşandəşone. Odəmon beşən məhkəmə bina vədən ıştə etirazə hərəkəton dəvom kardəşone, bə devləti və prezident Əliyevi adres qonə sıxanon bə zıvon vardəşone.  Əlavə polisə ğıvvon omən, etirazkaron çe əraziku diəro kardəşone.

Qəncə məhbuson 7 nəfəro ibarət  7-minə qrupi məhkəmən bə orəx rəsedə. Həmonə ruji, yəni avğusti 15-ədə Boku Sabunçi rayoni  məhkəmədə prokurori çe məhkəməku bo 6 nəfəri 4 soriku tosə 20 sori zindonə cəzo bırie, məhbus Oqtay Huseynzadə isə bə umrinə zindonə cəzo məhkum karde piəşe. Huseynzadə bımi de şiddəti etiraz kardəşe, votəşe ki, ey hiç qıley qıno nişe, əqər bey ım hukmi bıdon əv ıştəni bəkışte, çimi qıno çe Azərbaycani hokuməti səpe bəmande. Çəyo vəkilon de hakimi arədə hesıbes eqıniə. Hakimi bə Vəkilon Kolleqiya zanq kardəşe, çəvonku bə Kolleqiya ıştə şikayət rosniəşe. Məhbuson əvlodonən bə jıqo vəziyyəti fəal etiraz kardəşone, valideynonədə çand kəsi dıl şə, bo əvono bə məhkəmə təciliə tibbiə komək vanq kardəşone.

Həmən vote lozime ki, ponə sori iyuli 10-də Qəncədə dəvardə aksiyadə Rəşad Balakişiyev ki, 2 nəfər polisə zabit kıştəşbe, çey nomən ım qrupi tərkibədə heste, əmo əv həmonə hadisonku çand ruj dəvardə bəpeş polison tərəfo ğətl bıe səbəbiku, bə çey barədə cinayətə koy xitam doəşone.