Biləsuvari etirazəkonədə 5 nəfəri bə cinayət məsuliyyət cəlb bəkarden

Dekabri 22-minə ruji Biləsuvarədə məskun bıə Cəbrayil rayoni pənahəndeon bə çəvon ğəsəbə bərği ğət be səbəbiku etirazə aksiya dəvuniəşonbe. De polisi dave eqınəbe. Polisi çəvonədə 3 nəfər fəal - Cəlal Ğuliyev, İlkin İskəndərov, Quləğə Əliməmmədov dəstqir kardəşbe. Isət çəvon münasibətədə cinayətə təhğiğat bino kardəşone. Respublika Sər Prokuratura Qonə Cinayəton dair İstintağ idarədə de cinayət məcəllə 3 qılə maddə əvoni ittiham kardedən.

Sər Prokuratura ıştə hüğuğon tələb kardə dinc etiraz aksiya fəalonədə 3 kəsi bə cinayət məsuliyyəti cəlb karde dılış sərin bə ni. Bə Sər prokurori 1-minə müavin Rüstəm Usubovi təğdimati əsasən həmonə aksiya əlavə 2 nəfər fəal - Ülvi Ğuliyev və Zaur Feyruzliən dəstqir kardəşone. Məhkəmə ım 5 nəfəri bə 3 manq müddəti  müvəğğəti bə zindon dənoe ğəror doəşe.

Hüğuğ müdafiəçion bə ım 5 nəfəri doə ittihamon siyasi motivin hisob kardedən. Hüğuğşünas Rəsul Cəfərov votedə ki, bə ictimai asayişi darışte səbəb bıə etirazə aksiya qorə bə cinayət məsuliyyət cəlb karde həmə dınyoədə bənə siyasi maddə ğəbul kardedən.

Məhbus Cəlal Ğuliyevi moə Hüsniyyə Məmmədova bə BBC Azərbaycani müxbiri votəşe ki, bey  ıştə zoə vinde icazə dodənin. Tosə ısət ey konco oğəte barədə bey hiç qıley məlumat doəşon ni. Vəkil Elçin Sadığoviən bə "Azadlığ radiosu" votəşe ki, tosə ısət de ıştə müdafiəkardə müttəhimi vindemon karde bey imkan doəşon ni.