Boku hokumət de rışvəxorəti mubarizə bardedəni

Prezident İlham Əliyevi çand kərə ıştə votemononədə rışvəxorəti beynəlxalğə miğyasədə bə devləti və milləti imici çanədə zərbə je, de ım ictimaiyə bəlo mubarizə barde zərurət ğeyd kardəşe, de ım məğsədi muxtəlifə komitə və təşkilaton onoəşone. Əmo ım tədbiron hiç qıley nəticə doəşon ni. Rışvəxorəti və korrupsiya çoko ki, devlətə orğanon həmə vəsionədə hokumran bıe, ısətən hokumrane.

Meydan TV de ım problemi əlağədar Qeyqel rayoni Uçtəpə di əraziədə məskun eqıniə, Kəlbəcəriku kuçovniə odəmon quzəroni barədə qəp jəşe. Im odəmon votəşone ki, bə diy penə məhəllə ğaz okırnişone, əmo çəvon məhəllə çe yodo beşə. Əvon çand bəjəm Qəncə şəhəri Ğaz İstismarə İdarədə bıən, de məktubi bə çey rəhbəriyyəti rəsmən muraciəton kardəşone. Çimon nəticən əv bıə, bəvon votəşone ki, har kəsoyb 2 həzo mənot bıdo, 1 manqi dılədə çəvon kəon de ğazi təchiz bəkarden. Qəncə ğazə idarədə bə muxbiri votəşone ki, Uctəpə diy i tərəf de ğazi təchiz bıə, bə dıminə tərəfiən ğazə lulə okırniə, bo abonenton hisobkardə cihaz və baxşkardə aparaton tazisə noə bıən. Əmandə koonən de nubə icra kardə bəbe.

Siyəzən rayoni əji Kəmalə Vəliyeva həm quzəran, həmən səhhətış rışvə doe ro  imkan nıbe səbəbiku bə ənədurumə hol omə beşə. Çey lınq qanqrenay. Ko karde zınedəni. De Heydər Əliyev fondi koməki Boku Topçubaşov nominə mərizxonədə muayinəku dəvardə, bey arayiş doşone ki, bə pensiya beşo. Siyəzənədə isə bey votedən ki, bımi ro 1500-2000  mənot rışvə doənine. Vəliyevan anədə pul nişe ki, rışvə bıdo,  pensiya se bızıno. Bə muxbiri votəşe ki, nunpatə sexədə ruji bə 5 mənot ko kardedəbe, ısət həni bə ko şe zınedəni. Kənan nomədə i qılə zoəş heste, əvən mağazadə fəhlə ko kardedə. Çey məvacib bə çəvon harde, ijən bə çey dəvocati bəzu rəsedə. Nə qıley təşkilat, nə qıley şəxs ni ki, bə ım beçizon komək bıkardo. Rışvəxorə məmuron əvon bə vəşimarde dıço kardəşone.