Boku hokumət çe əhali mulkiyyət huğuği təmin kardedəni.

Avropa Bəşəri Huğuğon Məhkəmə de Az.R şəhrıvandon əlağədar 37 nəfəri şikayəti barədə ğəror bekardəşe. Demokratikə Təşəbbuson İnstituti tədğiğatə qrupi bı imi aid hesabat elan kardəşe.

Bə Meydan TV nıvıştə məğalə əsasən ım şikatkardəkəson həmə ə şəxsonin ki,  mənzilonşon çe Ğərəboği konflikti nəticədə bə Boku pənah vardə odəmon tərəfo zəbt bıə. Bumiə məhkəmon həmonə mənzilon tey karde və bə çəvon ğanuniə xıvandon oqırdınie barədə hukm bekardəşe, əmo dırozə sorone ki, ım hukm icra bedəni, devlətən çe ım odəmon mulkiyyəti ənəqınieəti huğuği təmin karde ro hiç qıley adekvat tədbir vindedəni.

De ım problemi əlağədar bə Az.R de pənahəndon və kuçkardon koy əlağədar Devlətə Komitə rəsmi pars vığandə bıə, əmo ım komitə de həmonə parsi becəvob oğəte, zərərdidə şəhrıvandon huğuğon bərpo karde nıpie niyyət numayiş kardəşe. Imən bə mulkiyyətə huğuği dair Avropa Konvensiya prinsipon darıştə əməle.

Demokratikə Təşəbbuson İnstituti həmonə hesabati Az.R -ədə 2018-minə sori inzibati dəstqirə tədbiron və bə jıqo tədbiri hədəf bıə odəmon polison tərəfo bə bədrəftori məruz manedə faktonən əhatə kardəşe. Bı sənədədə nişon doə bedə ki, ponə sori çe 8449 inzibati dəstqirə cəzo 78 qılə siyasi motivin bıə. Həmən diə məkəmon ki, Parlamenti Respublika İnzibatiə Xətoon Məcəllədə xeyli qozəştinə əvəzon kardəşe, inzibatiə dəstqirə cəzon miğdar bə pionə sori nisbətədə 2 kərə ziyod bıə.

İnstituti pevolo kardə ım sənədədə jıqo qıley cəhətən ğeyd bedə ki, polison de dəstqirbıəkəson bədsulukə rəftor kardəşone, çəvon təcridxonə şəraitən bə muasirə standarton cəvob doə səviyyədə bıə ni.