Apelyasiya məhkəmə Qəncə məhbusonədə 1 nəfər azad kardəşe

Qəncə məhbusono ibarət 7 nəfəri ki, Sabunçi rayoni məhkəmə bo əvon 6 soriku tosə 9 sori zindonə cəzo bıriəşbe, avğustə manqi 23-ədə çəvon Apelyasiya məhkəmə bə orəx rəsə. Im məhkəmə çəvon 6 nəfəri cəzo muddət saru eğandəşe, 2 soriku tosə 5 sor muəyyən kardəşe. Çe Elvin Əliyevi cəzo bə 1 sor vardəşe ki, ım muddətədə əv zindonədə bıe səbəbiku əvış azad kardə. Navonə qrupon apelyasiya mənkəmədə 4 nəfərən azad kardəşonbe.

Qəncə məhbuson 8 nəfəro ibarət diqər qıley qrupi Apelyasiya məhkəmən ıştə ğəror elan kardəşe.  İminə instansiya məhkəmə bo əvon 5 soriku tosə 8 sori zindonə cəzo bıriəşbe. Avğusti 26-ədə Boku Apelyasiya Məhkəmə cəvon cəzo muddət 1 sor 6 manqiku tosə 5 sor muəyyən kardəşe. Muttəhimon ım ğəroriku norozi mandən, votəşone ki,  hiç qıley qono nişone, cəvon valideynon və vəkilon bəyon kardəşone ki, bə Ali məhkəmə şikat bəkarden.

“Azadlıq.info” de ım məsələ əlağədar huğuğə mudafiəkar Oqtay Quləliyevi fikron bə əhandon rosniəşe. Quləliyevi votəşe ki, Qəncə məhbuson 5 nəfəri azad, xeyli kəson cəzo muddəti bə kam kardə bəpeş cəmiyyətiku umu hestbe ki, əmandə 2 qılə qrupi ki, çəvon iminə instansiya məhkəmə hələ bə orəx rəsəni, muhakiməşon de ədaləti və obyektiv bəbarden. Əmo iyo ko tamam əks istiğamətədə şedə. Bə muttəhimon 10 sor, 20 sor, hətto umrinə cəzo bırie pidəşone. Hərcənd ki, həmonə odəmon Qəncə hadison vağeə beədə hiç Qəncədə bıə nin. Çəvon qıno çımədə ibarəte ki, əvon de ğatil Balakişiyevi i kuçədə jidən, və ya navko zindonədə dey ivrədə bıən, yainki dey salamməlekşon bıə. Bı səbəbon qorə əvonşon bə jıqo qonə cəzo məhkum karde pidə. Çəvon məhkəmə anədə ğeyri-ğanuni dəvardedə ki, hətto hakim bə muttəhimi “az ıştı qıno bətı subut bəkardem” – votedə.

Yıqo vəziyyət nişon dodə ki, hokumət de Qəncə məhbuson tale spekulyasiya kardedə. Sıftə bəvon qonə cəzo bıridə, çəyo de çəvon ım cəzo bə kam karde roy boştə xeyirxahə imic ğəzənc karde pidəşe.