Çe Aşura ruji fəziləton
Aşura ruj de miladi təğvimi sentyabrə manqi 10-də Az.R məçitonədə de huzn və matəmi ğeyd kardışone. De ım mərasimi əlağədar Boku hokuməti, polisə ğıvvon bə amadə vəziyyət vardışe, bə əhali çəşnavi doşe ki, çe məciti ərazionku bə kəno benışon, kuçəonədə şemonon təşkil nıkardon. Bənə dəvardə sori ımsorən tosə 17 sinninə hırdənon ım mərasimonədə iştirak ğədəğən kardışe.
Isət Az.R-ədə hokumətpərəstə odəmon çe Aşura ruji, İmom Huseyn (ə) şəhadəti əhəmiyyəti bə kam karde, çey cəmiyyəti dıl`ədə məhəbbəti zəif eğande ro bə muxtəlif bədxahə təbliğaton dast ğandedən. Əsil həğiğət isə çımədə ibarəte ki, İmom Huseyn (ə) de ıştə şəhadəti bo bəşəriyyəti ıştə həxon mudafiə karde, bə zulm və zolımkaron əleyh mubarizə barde roədə qıley məktəbi binovrəş noe. Hejo bı səbəbən bı tarixi dırozi zolımə hokumdaron daima bə Əhli Beyt (ə) məktəbi tərəfdaron divon qətəşone, Aşura faciə təsiri çe cəmiyyəti yodo bekarde ro bə har vasiton çanq qandəşone, əmo əvon nəinki bəştə məğsəd nail bıe zınənin, bə çəvon niyyəti bər əks, bə İmom (ə) məhəbbət həniən zumand bıə, Kərbəlo ziyarətkardə zəvvaron miğdar sorbəsor həniən vey bedə.
Haliyədə Respublikadə vəhabi, nurçi, həmən DAİŞ terrorə quruhi tərəfdaron motijə mande əsasə səbəbono qıleyən məhz Ozərboyconi xalqon mutləğə əksəriyyəti bə İmom Huseyn (ə) bino noə məktəbi sədağət nişon doe, çəvon məmləkətədə bə nohəxi və istibdadi əleyh bardə mubarizəy. Imi əmə Məhərrəmə manqi mərasimonədə de çand sa həzo odəmon Boku, Qəncə, Lankon, Şirvan və həniən co şəhər və dion məçit və ocəğonədə təşkil kardə əzadarə məclisonədə vindedəmon. Ozərbaycani xalqi bə Rusiya muhacirət kardə ğismən çe Rusiya bənə Moskva, Sankt-Peterburğ, Yekaterinburği veycəmiyyətinə şəhəronədə bəştə dini mənəviyyati sadiğ mandedən və har sor Aşura faciə əzadarəti de əzəmət və məhəbbəti ğeyd kardedən.
