Az.R Azadə Mətbuati İndeksdə 166-miə vırədəy

Dəvardə rujonədə Bokuədə Umumdınyo Mətbuatə Şuraon Assosasiya sorinə məclis dəvarde. Çe prezident Əliyevi bə ictimai-siyasi məsələon dair koməkkar Əli Həsənovi ım tədbirədə de yolə nitği votemon ehandışe. Votışe ki, “çəmə devlət bo KİV inkişafi ro de milyonon vəsait co kardedə, bo jurnaliston kə dutedə, bə çand sa jurnalisti fəxri nom və mukafaton doəşe.

Məmləkətədə 240 nomədə rujnomə və jurnal çap bedə, 11 qılə umumrespublika, 13 qılə reqional televiziya, 14 qılə radio fəaliyyət nişon dodə. Sosialə şəbəkəku istifadə kardəkəson miğdar 3 milyon nəfərisən veye”.

Hokuməti rəsmi şəxsi jıqo tarifinə qəp  bə eksperton etirazi səbəb bıə. Meydan TV çe təhlilqər Əliəsqər Məmmədli votəyon bə cəmiyyəti edaştəşe. Məmmədli Respublikadə sosilalə şəbəkə istifadəçion bə hamsuə keşvəron nisbətədə vey bıe səbəbi məhz məmləkətədə azad media muhiti nıbeyədə vindedə. Hokumətpərəstə Mass-media bə əhali obyektivə informasiya nıdoe səbəbiku, əvon bə sosialə şəbəkə tərəf şedən ki, çəğono sərostə xəbəon bısənon.

Tədğiğatkar jurnalist Xədicə İsmayılva isə votedə ki, hokuməti bo media vasiton xarc kardə milyonon bə azad media qəvi dəbaste xidmət kardəşe. Kaş ki, hokuməti ə pulon xarc kardəş bənəbe, bə azad media inkişafiən ım ğədər mane nəbi. İsmayılova əlavən votəşe ki, hokumət bə sosialə şəbəkə yuzeronən divon qətedə. Bə çimi dair çəvon dastədə xeyli fakton hestin. Əli Həsənovi sosialə şəbəkəonədə cəmiyyəti uzvon ıştə fikron azad surətədə ifadə karde barədə  votəyonən bə həğiğəti muvafiğ ni. Əqər Azərbaycanə Respublikadə azadə mətbuatə muhit mevcud bıəbe, əv “Bemarzə Reportyoron” təşkilati elan kardə ımsornə Dınyo Azadə Mətbuati indeksədə 4 pillə sari enəqıni, 180 keşvəri arədə 166-minə vırədə, bənə de Somali, Efiopiya, Eriteriya məmləkəton i restədə nəmandi.