İron və Tırkiyə iğtisodi əloğəon mıştərik kamissiya iclos.

İron və Tırkiyə iğtisodi həmkarion mıştərik kamissiya 27-nə iclos zinə bərpo be.

Bə İrib raporti əsos, İroni prezident aparati rəis Məhmud Vaezi ım iclosədə bə Tehron Ankara miyono stratejik əloğəon işorəş karde və ım 2 tərəfi irodə və xatir cəməti həmkarion qarantiyaəkə zınəş be.

Vaezi bənə İroni iğtisodi heyəti yol bə İron-Tırkiyə miyono bıə iğtisodi və ticari muğaciləon icra karde zərruriyati işorə və təkidış karde: Amerkə anti İron sanksiyaon kənoədə İron de Tırkiyə həmkarion xoto hiç məhdudiyətış ni və de tojə roon və ğeyri dıvləti baxşon koməki inkişof roon dəvom peydo bəkay.

İron və Tırkiyə miyono iğtisodi əloğəon mıştərik kamissiya iclos ımruj həm dəvom kardedə; zinə Vaezi de Tırkiyə nəğliyot vəzir və enerji iyən rabitə vəziron vindışonış karde və ıştə ım səfəri bərnaməon dəvomədə de Tırkiyə təbie enerji vəzir və Tırkiyə ticarət vəzir həm ımruj vindımon bəkay.

İron və Tırkiyə ıştə ticarət əloğəon miğdori bə 30 milyard dollar rosniyə fikədən.

Zinə həmçınin İroni islamiyə əloğəon və mədəniyət rabitə təşkilati rəis həm turizm sənaye barədə muzakirə karde xoto de Tırkiyə turizm və mədəniyət vəziri vindemon və muzakirəş karde.

Tojədən Tırkiyə ərzrom iğtisodi fəalon i bemoni rəis həm bə İroni Mako ozodə ticarət məntəğə iğtisodi zərfiyətonku istifodə karde xoto Tırkiyə taciron şoğ və həvəsi işorəş karde.