Boku hokuməti məmuron ıştə işqəncə əməlonku dast kəşedənin

Həfteyi bə nav AŞPA prezident Lilian Mori Paskye bə Boku səfəri çərcivədə de Ozərbaycani 1 qrup huğuğə mudafiəkaron didor dəvunişe. Helsinki Şəhrıvandə Assambleya Ozərbaycani Komitə həmsədr Arzu Abdullayeva bə “Turan” İnformasiya Aqentiyyəti votəşe ki, bı vindemonədə Respublika cəmiyyəti norohət kardə məsəlon, şəhrıvandon bə siyasi səbəbon təğib karde, bə məhbuson işqəncə doe, de əvon ğeyri-insonə rəftor karde barədə məlumat doəşone.

AŞPA prezident sentyabri 11-12-minə rujonədə Bokuədə səfərədə bıə. Çey hokuməti məmuron tərəfo bə şəhrıvandon jıqo zulm və işqəncə fakton bə ğeyd se, hiçən bey dəlil ni ki, ım məmuron bəştə jıqo cinayətə əməlon orəx bədon. “ Azadlıq.info” sentyabri 17-minə ruji Ozərbaycani Devlətə Miqrasiya Xidməti həmkaron 5 nəfər hindistanıjə şəhrıvandon dəstqir karde və bəvon işqəncə doe barədə nıvıştışe, Boku təcridxonəku ım hindistanıjon bəştə nezə odəmon kardə zanqi audio nıvıştəy bə cəmiyyəti bələd kardışe. Əvon bəştə əvlodon de telefoni bəme-bəme xəbə doəşone ki, təcridxonədə əvoni kudən, təhğir və exroc kardedən, vəşi oğətedən, harde dodənin.

Məlum bıə ki, ım odəmon bə Ozərboycon de turistə viza omən, Bokuədə kə bə kirayə qətəşone, həmonə kədə Miqrasiya Xidməti həmkaron əvon dəstqir kardəşone. Bəvon hiç qıley səbəb nişon doəşon ni. Cəvonədə çan kəsi hətto viza muddət hələ orəxəni. Çəvon əvlodon bə huğuğə-muhafizə orğanon məlumat doəşone, əmo hələ ki, çəvonku jı xəbə ni.

Meydan TV-ən Şirvan şəhəri 39 sinninə sakin Vaqif İsayevi ğətli barədə bə cəmiyyəti xəbə rosniəşe.  Çey moə Aybəniz Qulmaliyeva bo muxbiri qəp jəşe ki, rayoni polisxonədə bey votəşone, İsayev çe narkotiki dozasən vey istifadə kardeku mardə. Qulmaliyeva isə ımi təkzib kardedə, votedə ki, əvvəla çey zoə narkoman nıbe, dıminən çey bədənədə xeyli işqəncə rizon hestin. Əvşon kue-kue kıştə. Ekspertiza işqəncə əlaməton təsdiğ kardeku imtina kardedə. Prokurorən bə çəvon şikayəti pape bedəni.

Avropa təşkilaton İlham Əliyevi hokumətiku çand vaxtone ki, bə ıştə şəhrıvandon munasibətədə insonə rəftori bərpo karde məsləhət zınedə, əmo Boku hokuməti bəştə əhali doə zulm ğeyri-insonə hərəkət hələən dəvom kardedə.