Dini məhbus, AİP Ostoro təşkilati sədr Ruhulla Axundzadə səhhət vey qıvonine

Azərbaycani İslamə Partiya Ostoro təşkilati sədr Ruhulla Axundzadə 2011-minə sori de soxtə ittihamon Boku Qonə Cinayəton Məhkəmə bə 11 sor 6 manq muddətinə zindonə cəzo məhkum kardəşe. Ey 2013-minə sori mayə manqədə infarkt dəvuniəşe.

2016-minə çori çey zoə Məhəmməd Əli Axundzadən de şər və bıhtonə maddon Lankoni Qonə Cinayəəton Məhkəmə tərəfo bə 5 sor 8 manqinə zindonə cəzo məhkum bıe. Əvon dədə-balə tosə ısət çe Boku zindonxonəonədə ıştə məhbusə jimoni dəvom kardedən. Meydan TV, iyən Respublika co internet resurson dəvardə rujonədə çe Məhəmməd Əli Axundzadə zindono bə cəmiyyəti vığandə məktubi barədə xəbə pevoo kardışone. Jıqo məlum be ki, Ruhulla Axundzadə tosə ısət zindonədə i kərə infarkt, 2 kərə insult dəvuniəşe. Bey normal tibbi xidmət nişon dodənin, hətto çe kəyku bo eyo vığandə dəvocatonən zindoni koəkon bey vaxtədə rosnidənin. 3 sore ki, ey çe tibbiə muayinəku dəvunidənin, hərçənd ki, bənə ey məhbuson ki, səhhətədə qonə mışğılonşon heste, penitensiarə muəssisə mərizxonədə mualicə, doktori daimiə nəzarəti jitono bəninin. Axundzadə ıştə muraciəti orəxədə məmləkəti ictimaiyyətiku, huğuğə mudafiəkaronku, Beynəlxalğə Səlibe Sorxiku bə ım məsələ umjən qınie, çey pıə jimoni  xilasi ro komək nişon doe xahiş kardəşe.

Sentyabri 19-də Sabunçi rayoni məhkəmədə bə 7 nəfər Qəncə məhbusi hukm handışone. Vəkil Qanqa İbrahimovi bə BBC Nevvsi muxbiri votəşe ki, məhkəmə bo 1 nəfəri 2 sor, 2 nəfəri 7 sor, 1 nəfəri 9 sor, 2 nəfəri 18 sor, 1 nəfəri 20 sorinə zindonə cəzo bıriəşe. Muttəhimon və çəvon valideynon bımi etiraz kardəşone, bə hokuməti adres lənət votəşone.

Demiən de Qəncə hadison əlağədar dastqir bıə 60 nəfər dindori iminə instansiya məhkəmə proseson bə orəx rəsə. 17 nəfəri istintağ isə hələ dəvom kardedə. Çəvon arədə Qəncə şəhəri icra sərdari de qolulə jə Yunis Səfərovən heste. Çey istintaği barədə bə cəmiyyəti məlumat dodənin.