Boku zindonxononədə bə siyasiə məhbuson zulm kardedən

“Mısılmonon İbemonə Hərəkati” uzv, siyasi məhbus Əhsən Nuruzadə bə kars dənoəşone. Bı barədə bə Azadi Radio huğuğə mudafiəkar Oqtay Quləliyevi məlumat doəşe, votəşe ki, zindoni rəisi çeyku bə co məhbuson komək nıkarde tələb kardəşe, cəyo əvşon bə kars dənoə. Bə ım məsələ Peniyensiarə Xidməti çəvob jıqo bıə ki, cəzo muəssisə daxili rəftorə ğaydəon hestışe, həmə məhbuson bəpe bey əməl bıkardon.

Dini məhbus Əhsən Nuruzadə 2017-minə sori oktyabrə manqiku zindonədəy. Boku Qonə Cinayəton Məhkəmə bo eyo 7 sorinə zindonə cəzo bıriəşe.  

Meydan TV co qıley siyasiə məhbus Əfğan Muxtarlıən bə karser dəğande həxədə xəbə doəşe. Çe Muxtarlı vəkil Nemət Kərimli sentyabri 24-ədə ıştə “Fasebook” səhfədə nıvıştəşe ki, “Əfğan Muxtarlı 3 ruje ki, ənəhardə aksiya dəvunidə. Xahiş kardəşe ki, çey tono bışom”.

Meydan TV bı barədə bə Penitensiarə Xidməti pars vığandəşe. Çə vırəy de ictimaiyyəti əlağə şebə rəis Mehman Sadığovi ım fakt təkzib kardəşe,  votəşe ki, ənəhardə aksiya elan kardə məhbuson bə karser ne, bə Tibbi Sanitariya xonə vığandedən. Əfğan Muxtarli bə karser dənoe barədə xəbə sərost ni. Vəkil Kərimliən votəşe ki, diə məkəmon ki, həmonə zindonxonə rəhbəriyyət de Əfğani vindemon kardeədə bey mane bedə, əv nezə rujonədə de ey didor karde ro çey tono bəşe.

Jurnalist Əfğan Muxtarlı 2017-minə sori mayə manqədə Qurcistonədə dızdiəşone, bə Boku vardəşone.  Boku Qonə Cinayəton Məhkəmə əv bə 6 sor muddəti çe azadiku məhrum kardəşe.