Az.R -ədə bohoçiəti dəvom kardedə

Orəxnə rujonədə Az.R vıjoronədə moğnə ğıymət boho bedə, 15 ruji muddətədə 10 kopikiku bə 14 kopik ros bıə. “Maide.az” bə “Azadlıq.orq” sayti əsasən Respublika Kijəvonəti Cəmiyyəti sədr Aydın Vəliyevi sıxanon bə əhandon rosniəşe. Ey votəşe ki, moğnə ğıymət 1-2 kopik ziyod bıə, ımən de mevsumi əlağədare.

Bə di təsərrufati dair ekspert Vahid Məhərrəmli isə çey votəyon beəsos hisob kardəşe, votəşe ki, Respublikadə kaqə yomyə ğıymət daima boho bedə, ımən bə moğnə və kaqə qujdi boho bıe səbəb bedə. Çimi dıminə səbəbən bəvədəy ki, məmləkətədə minimum məvacib və pensiya məbləğ ziyod kardə bəpeş vıjoronədə iqlə moqnə ne, həmə məhsulon qıyməti boho bıe vindedəmon. Məhərrəmovi həmən ğeyd kardəşe ki, hokumət kafi ğədər bə ğeyri-natə sektori tənəvəc mandedəni, bə səbəbən daxili istehsal sorbəsor kam, idxal isə vey bedə. Imən daxili vıjorədə ğıyməton çe xarici təsironku bə jidasti vəziyyət eğandedə. Ey de kartofi əlağədar keşvəri vıjoronədə bə əməl omə şərait misal  vardəşe ki, əv orəxnə 2 sorədə kartofi ğıyməti xeyli boho bıe səbəbi daxili istehsali 30% kam beədə vindedə. Əqər 10 sor bə nav bə Respublika kartofi idxal 40 həzo ton bıebu, ısət ım rəğəm bə 200 həzo ton rəsə, yəni 500% ziyod bıə.  Respublikadə məhsuldarəti səviyyən xeyli kame. Ermənistonədə kartofi məhsuldarəti har hektarədə 25 ton, Respublikadə isə çəmi 15 tone. Jıqo vəziyyətən bə kartofi moyə ərzeşi ros bıe vardə bekardedə. Az.R postsovetə məkonədə bə əhali har i nəfəri nisbətədə ən kam kartof istehsal kardə məmləkəte. Erməniston bı nisbətədə çe Az.R-sə 2 kərə nim vey kartof istehsal kardedə.

Vahid Məhərrəmli vıjorədə ısətnə xaotik vəziyyəti səbəbi hokuməti di təsərrufati sahədə bardə kolhındə siyasətiku vindedə.