Boku hokumət çe sosialə şəbəkonku dezinformasiya pevolo kardedə

Oksfordi Universiteti 2019-minə sori sosialə şəbəkəonədə bə Qlobalə Dezinformasiya və Manupulyasaon dair ıştə hesabat elan kardəşe. Bı hesabatədə 70 qılə devləti miyonədə Az.R nomən heste.

Əyo ğeyd bedə ki, jıqo manipulyasaku istifadə kardə devləton miğdar har sor ziyod bedə, yəni ki, 2017-minə sori çəvon miğdar 28, dəvardə sori 48 bıə. Imsor isə 70 devləti hokuməton bə sosialə, əsasən bə Feyzbuk, Tvitter və Yutub şəbəkəon cıvonono ibarət ıştə trolon vığandedən ki, əvon de  hokuməti syiasəti tarif, muxalif fikrinə juzeron təkzib karde məşğul bıbon.

Meydan TV hələ 5 manq çimi bə nav de ım məsələ əlağədar qıley tədğiğat bardəşbe.  Bə oşko bekardəşbe ki, hokumət budcə təşkilatonədə kam məvacibinə odəmon bı təşəbbusi cəlb kardedə və bəvon tosə 300 mənoti məvacib dodə. Məsələn, Beyləqan rayoni məktəbon qıleyədə tarix  fənni tədris kardə muəllimi bə muxbiri etiraf kardəşe ki, rayoni əksər məktəbi direktoron maddi vəziyyətşon qıvonin bıə muəllimon bə ım ko çəlb kardəşone.

Bokuədə ko kardə qıley muəllimə votəşe ki, 4 qılə əğıl hestışe, əvoni təmin karde zınedəni. Bə səbəbən bə direktori təklifi rozi bıə. Sıftə manqi 300 mənot dodəbin, peşo 150 mənot doşone.

Qıley “Təciliə Koməkə Xidmət”ədə ko kardə şoferi votəşe ki, çey xidmət kardə mərizxonə doxtoron xeyli ğism bə ım koy mubaşire, çey ıştən  internetiku səş beşedəni, loziminə materialon doəşe bəştə vəyu, əv de ım koy məşğul bedə. Ey həmən ğeyd kardəşe ki, maddi ehtiyaciku odəmon bə jıqo koy rozi bedən. Çey qıley koy həmro etiraf kardəşe ki, ıştə jimoni dırozi hiç vaxt anədə dıjmon məsəş nıbe ki, sosialə şəbəkəonədə de troləti məşğul bıeku bəştə adres ım ğədər təhğiramizə ifadəon məsəşe.

Imən məlume ki, çe Tojə Azərbaycan Partiya Cıvonon təşkilat ım koy təşkil kardedə və bey istiğamət dodə. Iştə toyfə hakimiyyəti ğoym karde ro, cəmiyyətədə bə jıqo bemənəviyyatə əməlon rəvoc dodə.