Qəncə məhbusonədə qıleyən zindonədə vəfot kardışe

Sentyabrə manqi 29-ədə Qəncə hadisəon məhbus Eşqin Ğuliyevi Penitensiarə Xidməti mərizxonədə ıştə conış çe dast doə. Çey əvlodon bı barədə bə Meydan TV xəbə doəşone. Əv hepatitə noxəşiku əziyyət kəşedəbe. Boku Qonə Cinayəton məhkəmə boeyo 20 sorinə zindonə cəzo bıriəşbe.

Ğuliyev Qəncə məhbusonədə 2-minə odəme ki, zindonədə vəfot kardedə. İyuli 9-ədə həmonə mərizxonədə Aydın Ğurbanovi ıştə con aspardəşbe. Əvən xərcənqə noxəşiku məriz bıe. Bə çey məhkəmədə ıştə umri orəxnə rujon kədə ıştə əvlodon tono dəvunie, çəvon əhatədə marde xahişi hakim Azər Tağıyevi - “vindedəm, ıştı vəziyyət qone, əmo tıni bə kə dustəğəti vadoe nibəznem” - votəşbe.

“Mısılmonon İbemonə Hərəkati” sədr Taleh Bağırzadə jimoni həmro bə Leyla İsmayılzadə əleyh cinayətə ko bino kardəşone. Bı barədə Leyla xanımi bo “Amerika sədo” radio qəp jəşe. Votəşe ki, Ədliyyə Vəzarəti istintağə idarədə bey bə zindonxonə icazə nıbə məmulaton dəvunie ro cəhd karde maddə ittiham bə nav doəşone, çeyku bə co vırə nışe barədə iltizam səşone. İsmayılzadə ımən ğeyd kardəşe ki, jıqo qıley çalpəşığə ko martə manqi 21-ədə  deştə hırdənon bə Taleh Bağırzadə didor şeədə vağeə bıəbe. Bə vaxti ey ım koy həxədə hartərəfinə izahatşən doəbe. Isət çə hadisəku 6 manq dəvardə, ım dəpışiə ko sənibəton bə istintaği həmkaron yod dəşə.

De hokuməti jıqo ğeyri-ğanuniə hərəkəti əlağədar çe “Mısılmonon İbemonə Hərəkati” sədri muavin Elçin Ğasımovi bə Respublika ictimaiyyəti muraciətən votəşe ki, çəmə dini alimi de şər və bıhtonə maddəon bə zindon dəğandeşon kam ni, ısətən bə çey ailə əleyh jıqo bıhtonə ittiham bə nav doəşone. Bə 4 qılə əğıli bedədə perosniə zənəni əleyh tam beəsosinə cinayətə ko oj kardedən. Bəs kıve ıştəni çe milləti sipiriş, navğədəmə ruşinəfam hisob kardə odəmon? Əvon boçi bə hokuməti jiğo nohəxə əməli ıştə etirazə sədo barz kardedənin?

Çe Elçin Ğasımovi ım sıxanon “Qafqaz.ir” sayti bə əhandon nəzə rosniəşe.