Qəncə məhbusonədə 4 kəs azad kardışone

De Qəncə hadisəon əlağədar dəstqir bıə 8 nəfəro ibarət qıley qrupiən muhakimə bə orəx rəsə. Məhkəmə çəvonədə bə 4 kəsi şərti cəzo bıriəşe və azad kardəşe.

Emil Məmmədov dəstqir beədə 15 sinnədə, yəni nuəperəs bə, hakimiən çey ım cəhət bə nəzər səşe, bo ey şərti cəzo bıriəşe. Şahin Verdiyev zindonədə beədə infarkt dəvuniəşe, bə səbəbən bo eyən şərti cəzo muəyyət kardəşe, məhbus Vuqar Yusifov bə 1 sor 6 manq zindonə cəzo məhkum bıə, ım muddətədə əv zindonədə bıe, yəni çey cəzo muddət orəxe səbəbiku əvşonən çe zindono vadoə.

Əmandə məhbuson – Bəkrəm Əliyev bə 15 sor, Həbib Qurbanov 8 sor , Mirzə Huseynov 5 sor, Asif Cavadov bə 5 sornə zindonə cəzo məhkum bıən. Vəkil Şəhla Hummətova bə BBC Nevvs Azərbaycani votəşe ki, məhbuson ıştəni qınokar zınedənin, ittihamon rədd kardedən, bə səbəbən bə Apelyasiya məhkəmə şikat bəkarden ki, bə əvon bəraət bıdon. Məhbuson valideynonən vəkili votəyon təsdiğ kardəşone. 

Çoko ki, dəvardə bərnamədə xəbə doəmonbe, Ədliyyə Vəzarəti İstintağə İdarə bə “Mısılmonon İbemonə Hərəkati” sədr Taleh Bağırzadə jimoni həmro Leyla İsmayılzadə əleyh cinayətə ko oj kardəşbe. Bə səbəb ki, ey quya bə zindonxonə icazə nıbə əşya dəvunie piəşebən. Oktyabrə manqi 2-minə ruji ım koy təhğiğati bardə mustəntiği elan kardəşe ki, bə ım cinatyətə koy xətm doəşe, məvotbən bı əmələdə cinayətə tərkib nibən.  Leyla İsmayılzadə bə Meydan TV votəşe ki, ə telefon ki, çey hırdəni çantadə peyo kardəşonbe və bənə maddi subuti peqətəşonbe, bey oqırdıniəşone.

Siyasiə eksperton bə hokuməti jıqo namə hərəkəton doə ğıymətədə votedən ki, ım çe Respublika cəmiyyəti bə hokuməti ğeyri-insonə siyasəti de aktivə etirazə hərəkəton cəvob doe nəticədə mumkun bıe. Əmo ım hicən Əliyevon rejimi ıştə repressiv hərəkətonku dast kəşe nişon doə əməl ni.