Ostoro rayoni əhali qonə quzəron

Ostoro çe Az.R de İİR sərhəd rayone. Bo iğtisadi inkişafi ro çokə potensialə imkanon – munbitə zəmin, subtropikə iğlim hestışe. Soveti vaxtonədə ım rayon iğtisadi inkişafədə çe Respublika navğədəmə məntəğəono qıley bıe.

Isət çey iğtisadiyyat anədə bərbode ki, çıvrey əhali nimə bə Rusiya kuç kardəşe, əmandə niməyən de İroni hırdə ticarət karde ıştə əmrəməli de təhəri bə ro dodə. “ Tolishmedia.com ” bə Musavat sayti istinadən çe Ostoro rayoni əhali qonə jimoni mışğılon barədə bə əhandon qıley məğalə edaştəşe.

Həsən nomədə qıley ostoroji bə muxbiri votəşe ki, “ bə İron manqi 1 kərə ovaşte ixtiyarmon heste. Çəğono 30 kilo vəznədə məhsul  varde bəzınemon. İronədə ğıyməton erjone. Həmonə məhsulon vardedəmon  bı tərəfədə həvatedəmon. De ım vasitə ıştə xeyzoni vi-vay dodəmon. Rayoni əhali sərasər bekorəy. Hiç qıley sənaye muəssisə fəaliyyətış ni. Soveti vaxton şəhərədə fabrikon, dionədə sovxozon hestbin, əhali tamamən de koy təmin bıəbin, quzəronşonən barzə səviyyədə bıe. Isət vəziyyət tərsinəy. Rayonədə narkomaniyan bə qıley bəlo peqardə. Jəqo qıley həftə bedəni ki, polis narkotik həvate səpe odəm nıqəto.

Tahir nominə əjiən votedə ki, Ğusari əhali de Rusiya, Ğazaxi əhali de Qurcistoni, Ostoro əhaliən de İroni ıştə əmrəməli dəvunidən. Rayonədə turizmi, moyəvonəti, çayəvonəti, subtropikə beməyon perosnie və di təsərrufati diqər sahəon inkişaf kardovnie ro çokə imkanon heste, əmo hokumət bımon pape bedəni. Rayoni İcra hakimiyyəti sərdar Ğəzənfər Ağayev 7 sore ki, Ostoroədəy, tosə ısət şəhəri mərkəzədə qıley bulvar onoəşe, həmişə dey  fəxr kardedə. Əmo hətto şəhəri mərkəzi kuçonədə roon bərbod vəziyyətədən, asfalt beqıniə, çand sorone ki, təmir bedəni, Akademik Ziya Bunyadovi nomədə kuçə bərbodə vəziyyət bə ım vətənpərvərə alim, həmən ğəhrəmani ruhi behurmətəti qıley əloməte. Bərği xəttonən Soveti vaxtiku tosə ısət təmir kardəşon ni. 

Mılxəs, Ostoro rayoni mışğılon həddo ziyode, əmo əvoni çe arə barde ro rayoni rəhbəriyyət hiç qıley tədbir vindedəni.