Boku hokuməti tojə Sər vəzir.
Az.R Parlamenti ıştə oktyabrə manqi 8-minə ruji iclasədə Prezident İlham Əliyevi tojə Sər vəzir təyin karde barədə bə Milli Məclisi vığandə muraciət muzakirə kardəşe. Spiker Oqtay Əsədovi elan kardəşe ki, Sər vəzir Novruz Məmmədovi ıştə istefa barədə bə Prezidenti ovardəşe.
Prezidentiən Əli Hidayəti zoə Əsədovi tojə Sər vəzir təyin karde barədə bə Milli Məclisi muraciət vığandəşe. Çəyo Oqtay Əsədovi ım məsələ bə muzakirə bekardəşe. Deputaton bə tojə Sər vəziri xeyli tarif votəşone və ey bə ım vacibə post təyin bıe təsdiğ kardəşone.
Əsədov Əli Hidayəti zoə 1956-minə sori Naxcıvanədə çe moəo bıə. Moskva Xalğ Təsərrufati İnstitut orıxniəşe. 1995-2000-minə soronədə Milli Məclisi deputat bıə. 1998-minə soriku çe Az.R prezidenti bə iğtisadiə məsəlon dair koməkkar, 2017-minə soriku, həmən Prezidenti Adminstrasiyadə şebə mudir ko kardəşe. Sabiğ Sər vəzir Novruz Məmmədovən Naxçıvanıjbe, dəvardə sori aprelə manqi 21-ədə bə ım vəzifə təyin bıəbe. Çey istefa səbəbon barədə Respublika Mass-medion və siyasiə təhlilqəron hələ ki, hiç qıley fikir votedənin. Dəvardə manqonədə İlham Əliyevi bə devləti 2 qılə vəsilən – yəni bə Devlətə Əmniyyətə Xidməti və Daxili Koon Vəzarəti tojə vəziron təyin kardəşbe və əvonən Naxçıvanıjonbin. Çey bə navən bə Boku Devlətə Universiteti rektor vəzifə İlham Əliyevi Naxçıvanıj təyin kardəşbe. Bəvədə siyasiə analitikon ım təyinatonədə Əliyev-Paşayev klanon miyono şə mubarizədə Əliyev klani ğalib omə fakti vindedəbin.
Milli Məclisi iclasonədə həmən omə sori Devlətə budcə muzakirə kardedən. İğtisadşunas Vuqar Bayramovi bə Azadi Radio votəşe ki, vəhədənə sori budcə layihədə nati ğıymət 55 dollar nəzərədə qətə bedə. Və budcə mədaxili 57 % bə natiku omə pulon hisob pur bənine. Məmləkəti ixracatədə nati hissə 81% bıe bə nəzər bısənəmon, məlum bəbe ki, 2020-minə sori budcə çe xarici təsironku bə şıkır bıbe. Haliyədə dınyo iğtisadşunason vəomə sorədə iğtisadiə behran və nati ğıyməti xeyli erjon bıe proqnoz dodən. Imən bo Respublika iğtisadiyyati təhdidon bə əməl vardedə.