Boku hokuməti Ğəzax şəhəri “Tovbə” məçit rıjnie pidəşe.

Kərbəlayi Mircəfər Huseynzadə Azərbaycani İslamə Partiya Ğəzax rayon təşkilati sədre. 43 sinnədəy. Xeyzonxıvande. 4 qılə hırdənış heste. 2-minə qrup bemare. Ğəzax şəhərədə jimon kardedə. Iştə soədə “Tovbə” nomədə məçit inşa kardəşe.

Ey bə ğeydiyyat se ro bə rayoni və Respublika muvafiğə təşkilati muraciəton kardəşe, əmo əvon nəinki cimiku imtina kardəşone, hətto bə həmonə məçiti oçınie fikir dəğıniən. Əvən məcbur mandə bo koməki ro bə Tolışə Milliə Hərəkati sərdar Əliəkrəm Hummətovi muraciət kardəşe.

Həftəyi çimi bə nav çe Bokuku Devlətə Əmniyyətə Xidməti 7-8 nəfəro ibarət qrup bə Kərblayı Mircəfər ağa kə omən. Çəvonədə i nəfəri ıştənış bənə DƏX həmkar Kənan Əliyevi təğdim kardəşe, votəşe ki, de jurnalist Polad Aslanovi cinayətə koy əlağədar Mircəfər ağa kədə axtarış bardəninin. Əvon kəy divoədə Ayətullah Seyid Əli Xameney portreti oçınie tələb kardəşone, votəşone ki, əv çe Az.R devləti deşmene. Çe Əliəkrəmi portret vindəcəğin bə hiddət omən, votəşone ki, əv məvotbən ermənieybən. Bə Mircəfər ağa milli mənsubiyyətiən şək vardəşone, ey dəvinə karde, yəni çe sınağo dəvunie lozim be ğeyd kardəşone. Məçitədən axtarış bardəşone, bə məçit de məşo, yəni de lınqəğabi dəşən. Əbəlfəzl (ə) havzə pərçəm musadirə kardəşone, də nomiki, quya çe DAİŞ-i pərçəme. Ğeyrəz ımi 10-15 qılə dini kitob ki, Bokuədə çap bıən, və çe Mircəfər ağa telefon musadirə kardəşone. Bey bı barədə, yainki çe axtarışi nəticəon həxədə protokoli i nusxə, və ya co hiç qıley sənəd doəşonni. Çəyo əv bə Ğəzax şəhəri DƏX şebə bardəşone , əyo əvşon 8 saat bə təhğiğati məruz oqətə. Çeyku de Polad Aslanovi əlağon barədə xəbə səşone. Eyən votəşe ki, de Poladi cəmi 2 kərə təsadufi vindemonış bıə. Hiç qıley dustiəti və həmkarəti əlağonış bıə ni.

Isət Kərbalayı Mircəfər Huseynzadə çe İroni devlətiku siyasi pənahqoh se ro bə çey rəhbəriyyəti muraciət karde fikirədəy.