Qurcistonədə İmom Əli(ə) mevlud ğeyd kardışone.
Rəcəbə manqi 13-minə ruj, de miladi təğvimi martə manqi 8 Əmirəlmomin Həzrəte Əli (ə) moəo bə ruje.
“İslamazeri.com” sayt xəbə dodə ki, çe Xıdo vali, Peyğəmbər (s.ə.v.s) vəsi, mominon əmir çe İmom Əli (ə) de ım mevludə ruji munasibəti Qurcistoni Kasipi şəhristoni Çixirci diədə mərasim təşkil kardəşone. Bı tədbirədə şəhəri dini, elmi xadimon və ictimaiyyəti numayəndon iştirakşon bıə.
Məclis de Hacı Əli Nəğiyevi Ğıroni tilavəti bino bıə, çəyo çe Qurcistoni Mısılmonon İdarə şeyx Hacı Ramin İqidovi votemon kardəşe. Ey bə məçlisi əhli de ım idə ruji munasibəti təbrik votəşe, Həzrəte Əli (ə) fəzilət və şəxsi keyfiyyəton barədə ehandəşe. Ğeyd kardəşe ki, sərostə islamiə jimon karde piəkəs bəpe çey jimoniku ibrət peqəto, ey boştə numunə bızıno. Peşonə natiğon – Qurcistoni Ruhanion Heyəti uzv Kərbəlayi Firdovsi Ğasımov, çe Əl- Mustəfa Beynəlxalğə Universiteti Qurcistonədə numayəndə Hacı Davud Zare və həniən co dini xadimon Həzrəte Əli (ə) sofə mənəviyyat və barzə əxlaği cəhəton barədə bo mərasimi iştirakəkon qəp jəşone. Məddah Səid Həsən`i İmom Əli (ə) tarif kardə ş`er, mədhiyyə və ilahion handəşe.
Mərasimi sufrə ətrofədə dəvom kardəşe, bə tədbiri fəalon idə baxşə doəşone.
İslami Peyğəmbər (s.ə.v.s) votəşe ki, “ Mominon Əli bəpişone, munafiğon dey deşmenəti bəkarden”. Həzrəti Əli (ə) Xilafətədə ıştə hakimiyyət əsl ədalət və islami molyəton səpe onoəşbe. Imən bə dınyo moli ro ıştə əğeydə çe dasto doə odəmon xoş omedənıbe, əvon bə Həzrəti hakimiyyəti əleyh ğiyam təşkil kardedəbin. Əmo həmişən bə məğlubiyyət dıço bedəbin. Jıqo vəziyyətədə əvon ğəsd təşkil kardışone, ce hicri 40-minə sori rəməzonə manqi 21-də şion iminə imom Həzrəte Əli (ə) bə şəhadət rəse. Əmo çey noə irs və perosniə məktəb tosə ısət islami dınyoədə bənə ruşnə vəşedə, islami molyəton sof və pokiyəti muhfizə kardedə və bə ayəndə nəslon dəvunidə.
