Az.R iğtisadiyyati kom problemon çəş kardedə.

Aprelə manqi sıftənə ruji, çe “Brent” markaninə nati məzənnə bə 16 dollar eqıniey, Boku iğtisadşinason arədə bə təşvişi səbəb bıe. Əvon proqnoz doşone ki, əqər jıqo dəvom bıko, bo apreli orəxi Mərkəzi Bank mənoti devalvasiya karde məcburiyyətədə bəmande, ım devalıvasiya hətto 50 kopiki ğədərədən bıbo, bo keşvəri iğtisadiyyati qonə zərbə bəbe.

Bə nəzər bısənəmon ki, ımsornə budcədə nati ğıymət 55 dollar nəzərədə qətə bıə və çe Respublika, məxsusən ərzağə təchizat çe idxaliku jidastie və bımi ro xeyli valyuta xarc karde lozim bedə, nati məzənnə erjonə vəziyyətədə mande bo keşvəri iğtisadi , həmən siyasi vəziyyəti çanədə təhdid bə əməl varde vinde bəzınemon. Qubad İbadoğlu hisob kardəşe ki, Kaspi dıyoədə bekardə nati moyə 15 dollar təşkil kardedə. Imən ey nişon dodə ki, nati ğıyməti 16 dollari səviyyədə mande, bə Sokari faktiki iflasi səbəb bəbe.

Standard&Poor’s  kreditə aqentiyyət çe Az.R iğtisadiyyati barədə doə məlumatədə nıvıştedə ki, çey inkişafi proqnoz doe çətine , çunki, bı keşvərədə iğtisadiyyat həddo ziyod mərkəzine, çe devləti iminə odəmi dastədə cəm bıə. Korrupsiyan barzə səviyyədəy, bə ğanunon riayət bedəni, obyektivə məlumaton bə dast varde ro imkan ni. Təhlilqər Revşən Ağayev “Azadlıq.info”ədə nıvıştedə ki, Respublika Natə Fond orəxnə 3 manqədə 2,8 milyard dollar valyuta həvatəşe ki, çey 1,9 milyard martə manqədə xarc bıə. Yəni martədə, yanvar və fevralədə məsrəf bıə valyutasən 2 kərə vey valyuta həvatəşone.

İğtisadiyyati çəş kardə ım behran səbəb bıe ki, Milli Məclisi məmlkətədə icbari tibbi sığorta tətbiğ 2 sorən, yəni de tosə 2022-minə sori dıroz kardışe. Hərçənd ğəror hestbe ki, bo cəmiyyəti jimoni vacib bıə ım ko tosə ımsornə orəxi həmmə rayononədə tətbiğ bıbo.

Əlavən vote lazime ki, İcbari tibbi sığorta həxədə ğanun 2007-minə sori ğəbul bıə, Əliyevi hokuməti tosə ısət ım ğanuni bə jimon dəvunie hınəş rəsə ni.