Çe Boku hokuməti bə koronavirusi əleyh tədbiron.

Əliyev hokuməti İğtisadiyyatə Vəzarəti koronavirusə pandemiyaku beşe ro ıştə sosialə plan elan kardəşe. Bı planədə bə əhali dastəqi ro 2 milyard 500 milyon mənot vəsait co karde nəzərədə qətedən. Imən çe Respublika Umum Daxili Məhsuli (UDM) 3%-i ğədərədəy.

Qurcistonədə bo ım məğsədi ro ıştə UDM 3,5%, Amerika İbə Ştatonədə 10,7%, Almaniyadə 14%-i ğədər vəsait co kardəşone. Sloveniya boştə 2 milyoninə əhali 3 milyard avro pul nəzərədə qətəşe.

Bə ım proqrami əsasən Boku hokumət muəssisonədə 304 həzo koəkon ixtisari vəy se ro bə əvon miyonə manqə məvacibi miğdarədə kompensasiya bədo. Bə bekorə odəmon minimum manqə məvacibi ğədər, yəni 190 mənot komək bəkarden. 10 nəfərisən kam ko kardə qədə muəssison 2 manqnə vergiku azad bəben.

Əhali Sosialə Mudafiə vəzir Sahil Babayevi mətbuatə konfransədə votəşe ki, bə bekorəti qorə 190 mənotinə muavinət har ailədə bə 1 kəsi bədon. Həmən ailə uzvonədə qirəm i kəs muavinət və ya pensiya sedəbu, və ya zəminə mılkış hestışebu, həmonə ailə ım minimum koməkiku məhrum bəbe. Imən cəmiyyətədə bə mənfi reaksiya səbəb bıe. Qubad İbadoğlu  bə Sosialə Mudafiə vəziri ım votəyon bənə Konstitusiya şərton darışte ğıymət doşe. Votışe ki, əhali cərimə kardeədə məqər har ailədə 1 nəfər cərimə bedə, bə əmandəyon qozəşt kardedən? “Mill Şura” uzv Qultəkin Hacıbəyli bə “Azadlıq.info” sayti votəşe ki, hokuməti ım koronavirusə behran boştə bə ğəzənc peqordıniəşe. Çe ım fırsətiku istifadə muğabilədə, tibbi sığorta ləğv kardışe, har ruj çand həzo odəmi səpe de 100 mənot məbləğədə cərimə noe roy milyonon qırd kardedə. Qıley de Koronavirusi Mubarizə Fond onoəşe, şirkət və muəssisonku bə həmonə fond pul dodə ovoştınie. Sosialə şəbəkəonədə jıqo qıley xəbə pevolo bıe ki, budcə təşkilatonədə ko kardəkəson məvacibonədən bə həmonə fond pul ovoştınidən. Məsələn, muəllimon ıştə məvacibonku bəpe 20 mənot, səhiyyə koəkon isə 30 mənot bə həmonə fond pul avjor bıkon.