Boku hokuməti qıley dini fəalşən dastqir karde.

Polison “Mısılmonon İbemonə Hərəkati” qıley fəalən bə zindon dənoşone. Hikmət Ağayev de bə polisi tabe nıbe vonə oqətəşone. Im dindarə fəali pıə Xeyrulla Ağayev və Meydan TV məlumat doəşe ki, aprelə manqi 10-minə ruji Hikmət bə beçizə ailəon koməkə baxşə bardeədə polison əv de karantinə rejimi darışte vonə 100 mənot cərimə kardəşonbe.

Çey maşkinə ruji əv bəştə ko kardə mağaza şə, əvon omən əvşon çəğono bardə. 2 ruj çey ailə əçı barədə hiç vırəku xəbə qəte zınəş ni.  Apreli 13-ədə məlum bıə ki, əvşon bə 25 sutkəninə zindonə cəzo məhkum kardə.

Mısılmonə Hərəkati co qıley uzv Samir Babayevən marti 22-minə ruji Sabunçi rayoni məhkəmə de 30 sutkə muddəti bə zindon dəğandışbe. Polison əvşon bə əhali bepul maska və de koronavirusi mubarizə tədbiron təbliğ kardə buklet baxş kardə vırədə dastqir kardəşonbe.

Əliyevi  hokumət bə diqər siyasiə fəalonən repressiya tətbiğ kardedə. Bo video-bloqer Natiğ İsbatovi apreli 9-ədə 30 sutkəninə inzibati zindonə cəzo bıriəşone. Əv Abşeron Məşğuləti İdarə vədə etirazə aksiya vaxti reportaj kəşeədə polison tərəfo oqətəşonbe. İsbatov 1 sor bənavən deştə jıqo peşə fəaliyyəti əlağədar 1 manq bə zindon dənoəşonbe. Əv Feyzbukədə “ Bə korrupsiya ne bıvot” nominə səhifə , həmən “7gun.az” sayti həmkare.

Hokumət bə muxalifəti fəalonən divon qətə əməlonku omandedəni. Orəxnə 3 rujədə AXCP uzv Nicat Abdullazadə, çe Əli Kərimli koməkkar Faiğ Əmirli, çey muhafizəkar Ruslan Əmirovən polison oqətəşone, bo çəvon har kəsi 30 sutkə zindonə cəzo bıriəşone.

1 manq çimi bə nav AİŞ Devlətə Departamenti ıştə hesabatədə Az.R-ədə hokuməti bəştə şəhrıvandon mutəmadi divon qəte, çəvon huğuğon darışte barədə hartərəfinə məlumat pevolo kardəşbe. Əliyevi hokuməti bə dini və siyasiə fəalon ıştə repressiya siyasəti dəvom karde, çey bə dınyo cəmiyyəti nəzəron məhəl nınoe nişon dodə.