Polisxonədə bə dini fəali işqəncə doəşone.

“Mısılmonon İbemonə Hərəkati” uzv Hikmət Ağayev apreli 11-ədə de koronavirusi əlağədar bə əhali koməkə baxşə doe səbəbiku polison tərəfo dastqir bıe. Çey ailə uzvon ım koy təfərruat bo Azadi Radio qəp jəşone.

Məlum bıə ki, Ağayevi bə prokuratura muraciət kardəşe, həmonə muraciəti kopiyə həmən  bəştə ailə vığandəşe, nıvıştəşe ki, əv mivə-tərəvəz dukonədə ko kardedə, hakənə bə becizə ailonən koməkəti nişon ədey. Apreli 11-ədə de jıqo məğsədi çand qılə boxçə hozo kardəşbe. Əmo polison omin bə çey daston zəncir jeşone bardışone bə polisxonə. Əyo çeyku xəbə səşone ki, bey bo komək karde ro kii maliyyə dodə, həmən çey telefoni kod omute piəşone, ey ımi voteku imtina kardəşe. Bə qorə 4 nəfər polisi əv anədə kuəşone ki, çey dıl şə. Maşkinə ruji əv də çey ailə uzvon təhdid kardəşone ki, bə çəvon səən jıqo hənqomə bəvarden. Bəvədə əv məcbur mandə, telefoni parol bəvon doəşe. Polison çey telefoni məlumaton omutə bə peş bə bardəşone Xətai rayoni məhkəmə əvşon de bə polisi muğavimət maddə 25 sutkəninə zindonə cəzo məhkum kardə. Isət ım işqəncəon nəticədə Hikmət Ağayevi dasti qıley anqıştə arşiə, rosə quşşən eşə.

Çey vəkil Cavad Cavadovi təsdığ kardəşe ki, dey didor kardəşe, əmo bı barədə ətrofinə məlumat doe piəşni, votəşe ki, məhkəmə ğəroriku apellyasiya şikayət bədo. Boku şəhəri Sər Polisə İdarə mətbuatə xidmətiku bə muxbiri parsi cəvobədə votəşone ki, bə Hikmət Ağayevi işqəncə doe barədə bəvonku hiç qıley məlumat ni.

Daxili Koon Vəzarətədən bəştə vərdışi muvafiğ işqəncə fakton inkar kardedən, bə jıqo iddiaon bənə həmonə şəxson çe məsuliyyətiku ıştə coni peroxnie cəhdi ğıymət dodən.