SOCAR muflis bıe bəzıne.

Nat hasil kardə 23 qılə keşvəri bə çey hasilati kam karde dair “Həmkarəti bəyannamə” ğəbul kardəşone. Bə ım sənədi əsasən Az.R-ən ıştə nati hasilati har ruj 164 həzo barel kam kardənine. Bənə çimi nəticə SOCAR Boku, həmən “Star” Natcokardə zavodonədə istehsali məhdud karde məcburiyyətədə mandə.

İğtisadşunas İbadoğlu votedə ki, çe nati məzənnə dırozmuddətədə erjon mande SOCAR-i muflis karde bəzıne. Im natə kompaniya xarici ğarzon həxədə orəxnə məlumat bə 2018-minə sori orəxi aide. Bə vaxti çey xariciə ğarzə ehdədarion 9 milyard 660 milyon dollar bıe.

Natəvonon Huğuğon Mudafiə Təşkilati sədr Mirvari Ğəhrəmanlı xəbə doəşe ki, “Azneft” İstehsalə İbemoni ki, bə SOCAR-i tərkib daxile, tosə 5 həzo nəfər həmkari ixtisar çəş kardə bedə. Haliyədə Enerqetika Vəzarətədə hışkiədə nat bekardə 5 qılə muəssisə, həmən i rujnə hasilatış 3 tonisə kam bıə natəçolon dəbaste məsələ muzakirə bedə. OPEC-i vədə peqətə təəhudi icra karde ro Boku hokumət  ım idarəon istismar kardə 1500 -sən vey natə çoli bəpe dəbasto.

SOKAR-i natəvononədə qıley bo Meydan TV qəp jəşe ki, ım natəçolon dəbaste nəticədə xeyli odəm ıştə koə vırəon qin bəkarde.  Qımon heste, ə koəkon ki, dəvon muvəğğəti muğavilə dəbastəşone, çəvon muğaviləon dıroz nıkon. Rəhbəriyyəti nafkoən çe ım metodiku istifadə kardəşe.

SOKAR-iku isə bəyon kardəşone ki, haliyədə koəkon ixtisar karde həxədə hiç qıley ğəror ni. Umumən həmkaron kutləvi ixtisar karde nəzərədə qətəşon ni.

İğtisadşunas Revşən Ağayevi ğeyd kardəşe ki, Azərbaycani Devlətə Natə Fondi ıştə dəvardə sori ğəzənci 42 % məsrəf kardəşe ki, ımən 1 milyard 984 milyon dollar təşkil kardedə. Umumən isə orəxnə 3 manqədə çey aktivon 2 milyard dollar kam bıə . Mılxəs, Devlətə Natə Fond ıştə budcə ehdədarion icra karde ro 500 milyon dollarinə aktivon həvate məcburiyyətədə mandə.