Rusiyadə azərbaycanıjə şəhrıvandon qonə vəziyyət.

Rusiyadə de karantinə rejimi əlağədar ıyo muvəğğəti ko kardə muhaciron quzəron xeyli qıvonin bıə. Bə Meydan TV doə rəsmi məlumati əsasən 2019-minə sori iqlə Rusiyadə bo ko karde ro 138 həzo 747 nəfər azərbaycanıjə şəhrıvand rəsmən çe ğeydiyyato dəvardə.

Bə miqrasiya məsələon dair ekspert İlkin Nəzərov votedə ki, haliyədə nəinki Rusiya, həmən Ukrayna və diqər post sovetə devlətonədə bo ko karde ro omə azərbayçanıjə şəhrıvandon miğdari barədə dəğiğ məlumat ni. Imən de pandemiya əlağədar həmonə odəmon muəyyən karde və bə vətən oqırdınie məsələdə mışğılon bə əməl vardedə.

Fuadi 51 sinn hestışe. 1 sor be ki, Kiyevədə inşaatədə ko kardedəbe. Ailəş Sabirabadədə jimon kardedə. Har manq bo əvon de 200-300 dollar vığande roy ıştə xeyzoni de təhəri vi-vay dodəbe.  Isət de karantini obast,  inşaatə obyekton həmə dəbastə bıən. Əv, həmən çey briqada həmroon ki, 20 nəfəro ibarətin, mandən be ko, bə vətənən oqarde zınedənin.  Bə Azərbaycani Ukrayna səfarəti çand kərə muraciət kardəşone, çəğono cəvob doəşone ki,  bo koməki ro jı imkan nişone.

Azərbaycni Devlətə Miqrasiya Xidməti İctimai Şura sədr Azər Mehdiyevən ğeyd kardəşe ki, ısət devlətə marzon dəbaste səbəbiku şəhrıvandon bə vətən oqırdınie ko xeyli bə anqıl qıniə. Im həmən bə qorə jıqoe ki, çəvon miğdari barədə dəğiğ məlumat ni. Ey həmonə muhaciron dəvət kardəşe ki, çe Azərbaycani səfarət və konsulatonədə  ğeydiyyato dəvardon. Hokuməti nəzərədə qətəşe ki, de həvapeyma çarter reyson təşkil bıkardo. Har ruj 200 nəfəriku tosə 400 nəfəri bə vətən oqırdıno. Bileti puli bəpe həmonə odəmon avjor bıkon.

Çe Prezidenti Adminstrasiya Xarici siyasətə məsələon dair şebə mudir Hikmət Hacıyevi məlumat doəşe ki, mayə manqi dırozi devləton arədə bo sərnişin kırnie ro həvo nəğliyyati  əlağəon bərpo karde nəzərədə qətə bıəni.