Az.R-ədə 4 qılə bank iflas bıe.

Az.R iğtisadiyyatədə dəvom kardə dırozmuddətinə behran çey maliyyə sektorşən əhatə kardə. Mərkəzi Banki sədr Elman Rustəmov 2 həftə bə nav əhali xatırcam kardedəbe ki, məmləkəti bank sektori likvidəti kafi səviyyədəy.

Əmo apreli 27-ədə xəbə beşe ki, bə 4 qılə banki muvəğğəti nəzarətəkaron təyin kardəşone, çimiən məna əve ki, ım bankon idarə kardə orqani səlahiyyəton çəvon dastonku səşone. Ruji bədiqə Mərkəzi Banki çımonədə “Atabank” və “Amrah Bank”i lisenziya ləğv kardışe. İğtisadşunas Natiğ Cəfərli fikir jıqoe ki, ım bankon xeyli vaxtbe, maliyyə problemşon hestbe, hətto çe əhali əmonəti bəvon oqırdınie imkanədə nıbin. Hokumət bəpe ım ğərori vey vaxt bə nav bəde. Cəfərli həmən əlavə kardəşe ki, ım bankon depoziton bəpe Əmonəton Sığorta Fond oqordıno, əmo ım fondədə vəsait ni. Qımon heste ki, Mərkəzi Bank bə Fondi kredit bıdo. Im bankon ğarzi oqırdınie ro 800 milyon mənot lozim bəbe. Navonə behranədə ey bə Fondi 500 milyon mənot doəşbe. Fondi ə vəsait dələmurd kardışe.

Bə Meydan TV doə xəbə istinadən “Atabank” və “Amrah Bank” ıştə maliyyə vəsaiton tamam məsrəf kardəşonebən. Bə çəvon səhmdaron təklif doəşone ki, bəştə bankon sənibəton kapital bınon, əmo əvon intina kardəşone. Diqər 2 qılə bankədə - “AGBank” və “NBCBank”ədə təftişə tədbiron dəvom kardedə.

İğtisadşunas Qubad İbadoğlu fikirən jıqoe ki, bə Azərbaycani bankon etibo ni. Çunki əvon azad fəaliyyət nişon doe imkaniku mərhumin və çe siyasi hakimiyyətiku jidastin. Mustəğilətiku dəvardə anədə vaxtonədə məmləkətədə bənə iğtisadiyyati co sahəon bank sektorədən azad rəğabətinə vıjor bə əməl ome imkan nıdoşone. Jiqo vəziyyəti ziyan bə əmonətçion qınidə. Əvon vey kərə ıştə pulon bə dumo oqırdınie zınedənin. Isətən jıqo bəbe. Sığorta nıbə əmonəton oqırdınie mumkun nibəbe.

Haliyədə Respublikadə ğeyrəz ım 4 qılə banki 26 qılə bank fəaliyyətədəy.