Beynəlxalğə Dini Azadion Komissiya Az.R-ədə dindaron vəziyyətiku norohəte.

Beynəlxalğə Dini Azadion Komissiya aprelə manqi 28-ədə ıştə hesabat bəyon kardəşe. Bə Amerika Devlətə Departamenti məsləhət zınəşe ki, çe Az.R nomiən bə dini azadıon darıştə məmləkəton siyahi dəğando.

Komissiya ğeyd kardedə ki, Az.R 2009-minə sori ğəbul kardə “Dini həxədə ğanuni” bə beynəlxalğə bəşəri huğuğə standarton muvafiğ karde ro de Əliyevi hokuməti ko karde lozime. Hokumət bə şəhrıvandi dini əğidə muvafiğ bey hərbi xidmətiku azad bıe və ya alternativə mulki xidmət dəvardə imkani doənine. Im huğuğ həmən Az.R konstitusiyadə təsbit bıə və hokuməti çe Avropa Şura vədə bı barədə ehdədari peqətəşe.

Komissiya ğeyd kardedə ki, dini icmaon fəaliyyətən devləti sərt nəzarəti jitonoe, çe ğeydiyyato dənıvardə icma fəaliyyət kriminal hesob bedə. Dini ədəbiyyati nəşr karde, həvate, demiən dini təbliğati barde ro çe devləti icazə tələb bedə. Çimi nəticən əv bıə ki, xristianə icmaon çe tarsiku ıştə fəaliyyət dəparçıniəşone və ya xeyli məhdud karde məcburiyyətədə mandən. Komissiya ğəbul kardə ım sənədədə votə bedə ki, tosə dəvardə sori orəxi Az.R zindononədə 45 nəfər dini məhbus hestbe, çəvon əksəriyyət Mısılmonon İbemonə Hərəkati uzvonin. 2018-minə sori Qəncə hadison nəticədə 80 nəfər dastqir bıə ki, çəvonən xeyli ğism dindarə odəmono ibarəte.

Amnesty İnternational təşkilatiən həmonə ruji, yəni apreli 28-ədə de koronavirusə pandemiya əlağədar karantinə rejimiku bəştə siyasiə rəğibon əleyh bənə vonə istifadə kardə devləton dair tənğidiə məruzəş dərc kardə. Əyo əlbəttə ki, bə Əliyevi hokuməti dair fikron hestin. Məruzədə ğeyd bedə ki, “Azərbaycani hokumət COVİD-19 pandemiyaku muxalifəti məhv karde ro bənə vonə istifadə kardedə. Marti 19-ədə prezident Əliyevi pandemiya vaxti muxalifəti təcrid və təmiz karde zərurət ğeyd kardəşe. Çe ım votəyon bə peş muxalif fəal Tofiq Yaqublu , huğuğə mudafiəkar Elçin Məmməd bə cinayətə məsuliyyət cəlb bıən, çan kəs siyasi və dini fəal dastqir kardəşone.