Az.R-ədə karantinə muddət dıroz kardışone.

Az.R Vəziron Kabineti tono Operativ Ğərarqohiku bə APA məlumat doəşone ki, Umumdınyo Səhiyyə Təşkilati doə məsləhəton bə nəzər səşone , Respublikadə karantinə muddət tosə mayə manqi 31-minə ruji dıroz kardəşone.

Ğərərqohi həmən əhali bə ım mərəzi mubtəlo bıe və noxəşinon şifo peydo karde dinamikadə pozitiv təbəddulaton bə nəzər səşe, kali məhdudiyyəton həmul karde barədə ğəror doəşe. 

Respublika əraziədə çe mayə manqi 4-minə rujiku devləti təşkilaton, fərdi ticarət və həniən co xidməti muəssison, dəlokxonə, reçinəti salonon, kafe, restoran, çayxonəon fəaliyyət, rayonon və şəhəron arədə nəğliyyati şe-omə hərəkəton bərpo bəben, əmo ım hələki bə de ictimai nəğliyyati sərnişinkırnie aid nibəbe.  Ğeyrəz Boku, Sumğayıt, Qəncə, Lankon şəhəron və Abşeron rayoni ərazi, məmləkəti əmandənə məntəğəonədə SMS icazə və “İcazə.e-gov.az” portalədə ğeydiyyato dəvardə sistemən ləğv kardə bedə.

De  jıqo həmul kardə ğərori bahəm xeyli məhdudiyyəton tosə manqi orəxi ıştə zuədə bəmande. İctimaiə vıronədə - bulvar, park və istirahətə məkanonədə 10 nəfərisə ziyod odəmi bə i vırə cəm bıe qədəğəne, Respublika həmmə təhsilə muəssisəonədə tədrion tosə manqi orəxi dənıbəvunien.

Operativə Ğərarqohi məlumatədə votə bedə ki, de COVİD -19 virusi əlağədar respublikadə vəziyyəti mutəmadi nəzarətədə oqətedən. Qirəm  hadisəon qardış bə neqativi tərəf inkişaf bıkardo, bəvədə mumkune ki, karantinə rejim sənibəton navkonə ğaydədə bərpo bıbo.

Ğərarqoh cəmiyyəti dəvət kardedə ki, bə şəxsi qiqiyena, tibbi-profilaktik ğaydaon əməl bıkon, zəruri nıbə holədə bə kəno benışon, ictimaiə vırəonədə de co kəson minimum təmasədə bıbon, bə devləti vində tədbiron dastək bıbon, bə Ğərarqohi dəvəti maksimum əməl bıkardon.