Az.R Cinayətə Məcəllədə islahat hozo kardedən.
Meydan TV xəbə dodə ki, Prezident Əliyevi cəzo siyasəti humanist karde ro bə Milli Məclisi qıley layihə təğdim kardəşe. Əyo bə Cinayətə Məcəllə tosə 200 qılə əvəz və əlavəon karde təklif bedə.
35 nomədə cinayəti dekriminal karde, 10 nomədə cinayəti tamam çe Məcəlləku bekarde, 25 nomədə cinayəti bə əməl vardə həddi ros karde nəzərədə qətə bedə. Bı barədə Milli Məclisi Huğuğə siyasət və devlətə soxtemonə komitə uzv deputat Kamal Cəfərovi məlumat doəşe.
Vəkil Yalçın İmanovi votəşe ki, bə media təğdim bıə ım məlumatədə konkret kom maddəon nəzərədə qəte nişon doəşon ni, bı səbəbən ey şərh karde mumkun ni. 2017-minə soriən de ım məğsədi Cinayətə Məcəllədə 200 qılə əvəzon kardəşonbe. Ğanuni ım cur rə-rə əvəz karde bə problemon mevcudiyyəti dəlalət kardedə.
Respublika Ali Məhkəmə bə REAL partiya sədr İlqar Məmmədov və həmonə partiya İdarə heyəti uzv Rəsul Cəfərovi cinayətə koy diə kardəşe, ğəror doəşe ki, bəvon bəraət bıdo, çəvon barədə doə məhkəmə hukmon ləğv bıko. Devlət bəvon qıniə ziyani muğabilədə bə Məmmədovi 234 həzo, bə Cəfərovi 57 həzo 400 mənot kompensasiya avjor bəkarde. İlqar Məmmədov çe Məhkəmə ım ğəror bo Az.R ədliyyə sistemi bənə qıley tarixiə hadisə ğıymət doəşe.
Vəkil Nemət Kərimli təəssuf kardəşe ki, Ali Məhkəmə çe Tofiğ Yaqublu barədən joqo ğəror bekardəninbe. Çunki əvən 2013-minə sori de eyni maddə, de eyni hadisə, yəni de İsmayıllı hadison əlağədar bə 5 sorinə zindonə cəzo məhkum kardəşonbe. Çey barədən Avropa Məhkəmə bəraət ğəror bekardəşbe.
De İsmayıllı hadisəon əlağədar məhkəmə prosesədə iştirak kardə vəkilonədə qıley Xalid Bağırov bıə, və bə həmonə məhkəmədə votə sıxanon qorə əvşon çe Vəkilon Kolleqiyaku beğandəşone. Isət Ali Məhkəmə bə həmonə muhakimə prosesi xitam doə bə peş Xalid Bağırovən bəpe bə Vəkilon Kolleqiya bərpa bıbo. Əmo ım Kolleqiya sədr Anar Bağırovi bə Meydan TV doə parsi cəvobədə votəşe ki, Xalid Bağırovi çe Kolleqiyaku beğande həxədə məhkəmə ğəror bekardəşe, ə ğəror hələən ğıvvədəy, bə səbəbən ey bə Kolleqiya bərpo karde nibəbe.
