Boku hokumət bəştə şəhrıvandon problemi beetino mandedə.

De koronavirusi pandemiya əlağədar Az.R ıştə sərhədon dəbastəşe. Çə vaxtiku bə nav xeyli azərbaycanıjə şəhrıvand bekorəti səbəbiku bə Dağıston və Rusiya co vilayəton bo ko karde şəbin ki, ıştə xeyzoni əmrəməli bə səhmon dənon.

Isət de ım pandemiya əlağədar Rusiyadəən muəssisəon dəbastəşone, həmonə azərbaycanıjə muhaciron bə vətən oqarde məcburiyyətədə mandən. Tosə ısət Samur sərhəd ovaştə məntəğədə bə tosə 600 nəfər odəmi Azərbaycani tərəf marzi ovaşte icazə dodəni. Dağıstani tərəfi ətrof məntəğə əhali həmonə odəmon bə məçit dəğandəşone, əvoni de ğida təchiz kardedən.

İsrail Hətəmovi kinə avtoğəzoədə tələf bıə, jimoni həmroşən Boku mərizxonədə behuş vəziyyətədəy. Hətəmov 20 ruje ki, çe Rusiyaku bə Azərbaycan ovaşte zınedəni. Ey bə Meydan TV məlumat doəşe ki, çe Azərbaycani sərhədi Rusiya tərəfədə tosə 1 həzo nəfəri azərbaycanıj heste ki, bə vətən oqarde pidəşone. Hətto dəvardə rujonədə qıley 4 sinninə hırdən çe sardqınieku marde. Azərbaycani Xarici Koon Vəzarəti mətbuatə xidməti sərdar Leyla Abdullayeva bəyon kardəşe ki, şəhrıvandon bə vətən oqırdınie hokuməti tərəfo bə plani muvafiğ icra kardə bedə. Cəvon marz ovaştə məntəğədə cəm bıe məsləhət ni. Bəvon de “Evə gedirəm” portali vasitə xəbə bəkarden, bəvədə əvon həmonə vaxti marzi ovaşte bəzınen.

Xaçmaz rayoni Ağarəhimoba və Kanə Xaçmaz diy sakinon rayoni icra hakimiyyəti bina vədə aksiya dəvuniəşone, ovi, ğazi nıbe, ro və həniən co problemonku şikat kardəşone. İcra sərdari muavini dəvon molağat bardəşe, votəşe ki, imkan bəcəğin çəvon problemon həll bəkarden.

Ostoro Səlivə diədən roon bərbod vəziyyətədəy, bə di ictimai nəğliyyat ko kardedəni, tosə ısət ğazə lulə və elektrik okırniə bıə ni. Əhali hamsuə diyku ki, 1 kilometr məsafə hestışe, de ıştə vəsaiti boştə  elektrikə xətt okırniəşone. Zəmin vajie səbəbiku çanq qılə kə de rıjie xəto vəbəvəy. Rayoni İcra sərdari muavini izah kardəşe ki, ım problemon çəvon nəzarətədəy, tədricən əvoni həll bəkarden.