Britaniya mətbuati Boku məmuron nubəti korrupsiya əməl ifşa kardışe.

“ Evening Standard” rujnomə Az.R məmuron korrupsiya əməli barədə təhğiği qıley məğalə dərc kardəşe.

Məlum bıə ki, Britaniya Milliə Cinayətə Aqentiyyəti qıley cinayətə ko bino kardəşe və bə Əliyevi hokuməti hələ 5 manq çimi bə nav pars vığandəşe ki, Mədəniyyətə vəzir Əbulfəs Ğarayev və Devlətə Sərhədə Xidməti rəis Elçin Quliyevi jimoni həmroon xeyli miğdarədə pul vəsaiton bə Beliz , Marşal və Seyşel cəzirə bankon dəğandəşone, Boku hokumət həmonə pulon mənşə barədə bə məhkəmə arayış bıvğando. İlham Əliyevən çe “Landromat” pul şıştə mərəşulə bəpeş  nubəti kərə beynəlxalqə miğyasədə beabur nıbe ro  əvoni çe vəzifəku beğande məcburiyyətədə mandə.  

“Azadlq.info” bə Azərbaycani kleptokratik rejimi onoə jıqo korrupsiya sistemi bo həmə dınyo bənə qıley xəto ğıymət doəşe. “Nur.az.kom” saytən ım mərəşulə barədə pars dodə ki, məgər hokuməti  ım ğədər penə məğaminə məmuron arədə jəqo qılə heste ki, dızdi nıkardo, rışvə nısəno, de xəzinə pulon dələmurd karde məşğul nıbo? Respublika har qıley şəhrıvand zınedə ki, har məmuri hakimiyyətədə bıə muddətədə hejo əhali talan karde niyyətş bıə.

Prezident Əliyevən çey idarə kardə devləti dınyo cəmiyyəti çəşədə çanədə bə beaburinə vəziyyəti dıço bıe yəğin ki çok dərəsedə. Bə səbəbən de islahat barde məğsədi ohilə vəzifədaron de cıvonə kadron əvəz kardedə. Imən Respublika cəmiyyətədə bə 2 çurə fikri səbəb bıə. Hokumətpərəstə təhlilqəron təbii ki, ımi bo devləti bənə xilasə roy tarif kardedən. Əmo muxalif , həmən obyektiv və betərəfə analitikon fikir jıqoe ki, Əliyevon sulalə hakimiyyəti mevcud bıə dıroz muddətədə bə əməl omə rışvəxorə sistemi bıno-pe de islah karde roy devlətədə ədalətinə usuli – udarə bərğəror karde mumkun bəbe. Bımi de kadrə islahati - yəni ohilə məmuron de cohilon əvəz karde roy ne, de devlətiə islahaton - yəni murtəce ğanunon de mutərəğği və demokratik ğaydəon əvəz karde roy nail bıe mumkune.