Boku hokumət bəştə şəhrıvandon soyb beşedəni.

Çe Rusiya de Az.R marzədə bə vətən oqardə azərbaycanıjon problem hələən həll bıə ni. Məlume ki, çe martə manqi 19-minə rujiku Boku hokuməti ıştə marzon dəbastəşe. Çə vaxtiku bə Rusiya bo mevsumi ko karde şə azərbaycanıjon bə dumo oqarde bə mışğıl peqardə.

Im ko bə qıley hədd rəse ki, əvon hətto bə Rusiya prezident Putini muraciət karde məcburiyyətədə mandən. Putiniən cəvon xahiş məseşe, bə İlham Əliyevi zanq kardışe ki, bəştə şəhrıvandon xıvand beşo. Çə vaxtiku sərhədədə dəpuşiə odəmon i ğism bə vətən vadoşone. Əmo ım problem hələn aktuale. Turan İnformasiya Aqentiyyəti ım məsələ səpe ruşnə eğandəşe. Asim Tağıyevi bo muxbiri qəp jəşe ki, Rusiya Fevğəladə Halon Vəzarəti boəvon marzi nezi Kullar ğəsəbədə çodoə duşərqoh ejənəşe. Bə Putini muraciəti bə peş Azərbaycani tərəfi əsasən əğılon, noxəşinon, zənənon və pirə odəmon bə vətən vadoşe. Haliyədə duşərqohədə tosə 500 nəfəri odəm mandə. Tağıyevi həmən votəşe ki, mayə manqi 28-ədə çe Azərbaycano məmuron omin. De vəziyyəti oşno bin. Hiç çi nıvotışone – beşin şin.

Duşərqohədə mandə odəmon həmən məlumat doəşone ki, iyuni 1-ədə bə 100 nəfəri marziku ovaşte icazə doşone, çəvonədə 40 nəfər çe duşərqoh odəmonbin. Əmandə 60 nəfəri çe konco ome məlum nıbe. İyo  jıqo odəm heste ki, 1 manqe çodoədə jidə, pulış orəxə, qiqiyenaş bevəcə vəziyyətədəy, əmo bey hələən marzi ovaşte icazə dodənin. Jıqo vəziyyət odəmon bə əsəbi vəziyyət dəşandəşe. Çand kəson bə ım beədalətə vəziyyəti etiraz karde səbəbiku hətto 3 sutkəku tosə 5 sutkə bə inzibatiə cəzo məhkum kardəşone. Çe Rusiya muxtəlif reqiononku bo marzi ovaşte ro omə azərbaycanıjon miğdar rujbəruj ziyod bedə. Bə qorən Boku hokumət bəpe bo sərhədi ovaşte ro doə icazəon miğdariən ziyod bıko.

Azərbaycani rəsmiyon bı məsələ mufəssəl şərh dodənin, votedən ki, şəhrıvandon bə vətən oqordınie bə qrafiki muvafiğ icra bəkarden.