Natəçolə rayoni sakinon ovi problem.

Kurə ru çe Natəçolə rayoni əraziədə bə Kaspi dıyo emedə. Isət ruədə ovi səviyyə anədə saru eqıniə ki, dıyo ov omedə bə ru pur bedə.

Bankə ğəsəbə sakin fermer İsbat Bayramovi de jıqo vəziyyəti əlağədar bə əməl omə problemon həxədə de Meydan TV muxbiri qəpədə votəşe ki,  Kuri ov anədə kam bıə, əv bə dıyo rəsedəni, orəxnə kilometron məsafədə dıyo suə ov bə çey məcra daxil bedə. Həmonə oviku nə bo heyvonon peşome, nəən kaştemonon sirab karde ro istifadə karde bedəni. Heyvonon jəqo ovi peşomeədə əvoni təblarz qətedə. Orəxnə həftədə vəziyyət həniən qıvonin bıə. Rayoni Mayak, Yenikənd dionədən ki, Kuri kəno ğəror qətəşone və çey oviku istifadə kardedən, ım problem bə əməl omə. Bayramov votedə ki, rayoni İcra hakimiyyətən ım problemiku xəbədoey, de “Azərsu” təşkilati bə ico əhali ovi problemi həll karde ro səy kardedə. Əmo ım məsələ hokuməti səviyyədə həll bənine. Çunki bı dionədə umumən tosə 30 həzo heyvon vi-vay dodən. Əqər əvon de ovi təmin kardə nıbo,  ğıssə muddətədə tələf bəben. Im problemi barədə bə rayoni Milli Məclisədə nıştə deputatişonən muraciət kardə. Həmə səlahiyyətinə məmuron votedən ki, ım mışğıli həlli iqlə ro hestışe ki, əvən Minqəçevir ovə amboku bə Kurə ru ovi vey vadoədəy ki,  ov bo bə Kasipi dıyo bırəso, demiən çe suə oviku pok bıbo.  Imən ki, çe Vəziron Kabineti və ya Prezidenti Adminstrasiya səviyyədə həll bənine.

Abşeron rayoni Hevsan ğəsəbə Bağlar nominə massivi əhaliən çe peşomə ovi , həmən roy problemiku əziyyət kəşedən. Baku.TV sayti həmkaron bə həmonə məntəğə şən, çə vırey əhali problemon de ıştə çəşon vindəşone. Məlum bıə ki, 35 sore bə çəvon şikaton əncom kəşə bedəni. Tosə ısət bə həmonə ğəsəbə nə peşomə ovə lulə, nəən asfaltə ro okırniəşon ni. Bı səbəbən əhali hələən ovi çe maşinonku de puli hıridə, roonən bərbod bıe səbəbiku ictimai nəğliyyat ko kardedəni, hətto təcili tibbiə komək maşinonən bə ğəsəbə omeku imtina kardedən.